विधान परिषदेच्या नाशिक स्थानिक स्वराज्य संस्था मतदारसंघात गोकुळ गिते यांच्या बंडखोरीमुळे सत्ताधारी महायुतीची डोकेदुखी वाढली आहे. या प्रकरणी तोडगा काढण्यासाठी मंत्री गिरीश महाजन व उदय सामंत नाशकात तळ ठोकून आहेत. हे दोन्ही नेते गोकुळ गिते यांचा जाहीर पाठींबा मिळवण्याचा प्रयत्न करत आहेत. पण गोकुळ गिते यांनी निवडणूक खूप पुढे गेल्याचे सांगत महायुतीच्या उमेदवाराला जाहीर पाठींबा देण्याचा प्रश्नच उद्भवत नसल्याचे ठणकावून सांगितले आहे. यामुळे महाजन व सामंत यांची गोची झाली आहे. महायुतीमध्ये नाशिक विधान परिषदेची जागा सत्ताधारी शिवसेनेला सुटली आहे. प्रारंभी गोकुळ गिते यांचे बंधू तथा भाजप नेते गणेश गिते यांनी या निवडणुकीसाठी उमेदवारी दाखल केली. पण गुरुवारी त्यांनी आपला अर्ज मागे घेतला. पण गोकुळ यांनी मात्र आपला अर्ज मागे घेतला नाही. त्यामुळे या मतदारसंघात गोकुळ गिते यांचा सामना महायुतीचे अधिकृत उमेदवार नरेंद्र दराडे तथा अन्य एक उमेदवार प्रसाद हिरे यांच्याशी होणार आहे. उमेदवारी अर्ज मागे घेण्याची मुदत संपल्यामुळे आता मंत्री उदय सामंत व गिरीश महाजन हे आता गोकुळ गिते यांचा पाठींबा मिळवण्याचा प्रयत्न करत आहेत. पण गोकुळ गिते यांनी पाठींबा देण्याचा प्रश्नच नसल्याचे स्पष्ट केले आहे. माझ्यावर कुणीही दबाव आणू नये गोकुळ गिते म्हणाले, महायुतीच्या उमेदवाराला जाहीर पाठींबा देण्याचा प्रश्नच येत नाही. आता निवडणूक खूप पुढे गेली आहे. समोरच्या उमेदवाराच्या (नरेंद्र दराडे) मुलाने माझा बाप काढला. अर्वाच्च शब्दांत धमकी दिली. त्यामुळे मला उमेदवारी करणे क्रमप्राप्त आहे. महायुतीचा उमेदवार क्रियाशील नसून, निष्क्रिय आहेत या निष्क्रिय उमेदवारासाठी भाजप युतीचे नेते माझ्यावर दबाव आणत आहेत. माझी त्यांना विनंती आहे की, त्यांनी माझ्यावर दबाव आणू नये. माझा प्रचार सुरू झाला आहे. येथील सर्वाधिक नगरसेवक माझ्यासोबत येतील असा मला ठाम विश्वास आहे. आता निवडणूक खूप पुढे गेली नाशिकच्या तिढ्यावर तोडगा काढण्यासाठी मंत्री गिरीश महाजन व उदय सामंत येथे आलेत. माझा अद्याप कुणाशीही संपर्क झाला नाही. विशेषतः माझा कोणता गैरसमजही झाला नाही. मला माघार घ्यायची असती, तर ती कालच घेतली असती. समोरच्या उमेदवाराने माझ्या घरी येऊन मला विनंती केली असती, तर मी माघार घेण्याचा विचार केला असता. पण मला शिवीगाळ झाली. माझा बाप काढला गेला. त्यामुळे त्यांना जाहीर पाठींबा देण्याचा विषयच येत नाही. आता निवडणूक खूप पुढे गेली आहे. ही काही ग्राम पातळीवरची निवडणूक नाही, असे गोकुळ गिते एका मराठी वृत्तवाहिनीशी बोलताना म्हणाले. गोकुळ गिते म्हणाले, मी भाजपचा बंडखोर नाही. माझे बंधू गणेश गिते भाजपचे सक्रिय नेते आहेत. भाजपचे लोक माझ्यावर का दबाव टाकत आहेत हे मला कळत नाही. नाशिकच्या निवडणुकीत माझ्यावर ओझर पिंपळगावची जबाबदारी होती. त्या ठिकाणी मी सर्वाधिक नगरसेवक निवडून आणले. हे उमेदवार नगरपंचायत निवडणुकीच्या वेळी कुठे होते? निवडणुकीत ते का दिसले नाही? त्यामुळे माझ्यावर कुणीही दबाव आणण्याचा प्रयत्न करू नये. ही निवडणूक गणेश गिते यांनीच लढवावी असे सर्वांचे मत होते. पण महायुतीत ही जागा शिंदे गटाला सुटल्यामुळे त्यांना माघार घ्यावी लागली. पण मी निवडणुकीवर ठाम आहे. माझा प्रचारही सुरू झाला आहे. हीच माझी रणनीती आहे. सर्वाधिक नगरसेवक माझ्यासोबत आहेत.
Source link
Headlines
