माजलगाव तालुक्यातील दिंद्रुड येथील शासकीय गोदामातील हमाल कामगारांनी कामबंद आंदोलन मंगळवारपासून (२३ जून) सुरू केले आहे. यामुळे गोदामांतर्गत स्वस्तधान्य दुकानांना स्वस्त धान्याचे होणारे वितरण ठप्प झाले होते. प्रशासनाच्या आश्वासनानंतर आंदोलन तात्पुर्ते स्थगित करण्यात आले आहे. गोदामात आलेल्या धान्याच्या पोत्यांची उठाठेव करण्याची कष्टप्रत काम हमाल करतात. परंतु गेल्या पाच महिन्यांपासूनची त्यांची मजुरी सबंधित यंत्रणेने दिली नाही. यामुळे हमालांच्या कुटुंबीयांवर उपासमारीची वेळ आली आहे. शाळा सुरु झाल्या असुन मुलांचे प्रवेश,शैक्षणिक साहित्याची खरेदी त्याच प्रमाणे घरखर्चासाठी हमालांना मोठ्या आर्थिक अडचणींचा सामना करावा लागत आहे. यामुळे केलेल्या कामाचा मोबदला प्रशासनाकडे मागून हतबल झालेल्या हमालांनी आंदोलनाचे शस्त्र उपसले आहे. दरम्यान हमालांनी मांडलेल्या मागण्या पूर्ण करुन थकलेली मजुरी द्यावी, असे हमाल कामगारांनी दिलेल्या निवेदनात म्हटले आहे. प्रशासनाने दिलेल्या लेखी आश्वासनानंतर हमालांनी आंदोलन तात्पुर्ते स्थगित केले. या मागण्यांकडे वेधले लक्ष मजुरीचे पैसे तातडीने द्यावेत, शिवाय उच्च न्यायालयाच्या आदेशानुसार २०१२ पासूनच्या थकीत महागाई निर्देशांक तातडीने पाठवणे, थेट वाहतूक धोरणात त्या-त्या ठिकाणच्या गोदामातील नोंद असलेल्या हमालांकडूनच काम करून घेण्याचे बंधन वाहतूक कंत्राटदारावर घालण्यात यावे. थेट वाहतुकीमध्ये माथाडी मंडळाने ठरवलेल्या हमाली दरानुसार हमाली लेवी भरण्याचे बंधन वाहतूक कंत्राटदार यांच्यावर घालण्यात यावे. अशा मागण्या आहेत. या आंदोलनात दिंद्रुड येथील शासकीय गोडाऊन मधील गणेश आढाव, रमेश किचमे, आश्रुबा किचमे, सुदाम ठोंबरे, माणिक भागवत, राम पारेकर बालासाहेब हारकळ, परमेश्वर चव्हाण आदी सहभागी झाले आहेत.
Source link
दिंद्रुडला हमालांचे कामबंद आंदोलन आश्वासनानंतर स्थगित:थकीत मजुरी द्यावी, प्रलंबित प्रश्न सोडवण्याची शासकीय गोदामातील हमालांची मागणी
