महाराष्ट्रातील वाढत्या वाहतूक कोंडीचा प्रश्न, रस्त्यांचे नियोजन आणि ई-चलानच्या अंमलबजावणीवरून महाराष्ट्र नवनिर्माण सेनेचे अध्यक्ष राज ठाकरे यांनी सरकारच्या कारभारावर टीका केली. वाशी येथे आयोजित मनसेच्या वाहतूकदार मेळाव्यात ते बोलत होते. ई-चलानला आपला विरोध नसल्याचे स्पष्ट करतानाच, मात्र ते ज्या पद्धतीने आकारले जाते, त्याची तपासणी होणे आवश्यक असल्याचे त्यांनी सांगितले. वाहतूक व्यवस्थेला शिस्त लावणे अवघड नसून, त्यासाठी केवळ इच्छाशक्तीची गरज असल्याचे मतही त्यांनी व्यक्त केले. राज ठाकरे म्हणाले की, राज्यातील वाहतुकीचा प्रश्न आपण अनेकदा भाषणांमधून मांडला आहे. येत्या काळात हा प्रश्न आणखी गंभीर होण्याची शक्यता आहे. देशातील वाहतुकीची परिस्थिती पाहिल्यानंतर आपल्याला देशाचे वर्तमान आणि भविष्य दिसते, असे ते म्हणाले. रस्त्यांवरील वाहनांची वाढती संख्या आणि वाहतूक कोंडी यांचा विचार करून दीर्घकालीन नियोजन करण्याची गरज त्यांनी अधोरेखित केली. ‘फक्त पूल बांधून वाहतूक कोंडी सुटणार नाही’ राज्यात ठिकठिकाणी फ्लायओव्हर आणि पूल उभारले जातात; मात्र हे बांधकाम करताना एकूण वाहतूक व्यवस्थेचा पुरेसा विचार केला जात नसल्याची टीका राज ठाकरे यांनी केली. रस्त्यांवर दररोज किती नवीन वाहनांची नोंदणी होते, किती वाहने रस्त्यावर येतात आणि कोणत्या भागात किती लोक वास्तव्यासाठी येत आहेत, याची माहिती व त्यानुसार नियोजन असणे आवश्यक आहे, असे ते म्हणाले. वाहतुकीच्या नियोजनातील त्रुटींचा अंतिम ताण पोलिसांवर पडतो, असेही त्यांनी सांगितले. वाढत्या वाहनसंख्येच्या तुलनेत रस्ते, वाहतूक नियंत्रण आणि शहरांच्या विस्ताराचे नियोजन केले नाही, तर भविष्यात परिस्थिती अधिक बिकट होऊ शकते, असा इशारा त्यांनी दिला. ‘मुंबईची लोकल कोलमडली तर रस्त्यांवर काय होईल?’ मुंबईच्या सार्वजनिक वाहतूक व्यवस्थेचा संदर्भ देत राज ठाकरे यांनी संभाव्य परिस्थितीबाबत प्रश्न उपस्थित केला. उद्या कधी मुंबईची लोकल सेवा कोलमडली आणि प्रवाशांनी स्वतःच्या गाड्या घेऊन रस्त्यावर येण्याचा निर्णय घेतला, तर शहरातील वाहतुकीचे काय होईल, असा सवाल त्यांनी केला. शहरांमध्ये वाहतुकीचे नियोजन आणि पर्यायी व्यवस्था यांना महत्त्व देणे आवश्यक असल्याचे त्यांच्या वक्तव्यातून स्पष्ट झाले. देशाचा जीडीपी ७.८ टक्क्यांवर पोहोचल्याचे सांगितले जाते; मात्र वाहतुकीसारख्या मूलभूत प्रश्नांवर नियोजन नसेल, तर अशा आर्थिक आकडेवारीचा सामान्य नागरिकांना काय उपयोग, असा प्रश्नही त्यांनी उपस्थित केला. ‘माझ्या चालकांनाही सिग्नल न मोडण्याची सक्त ताकीद’ वाहतुकीतील शिस्तीबाबत स्वतःचे उदाहरण देताना राज ठाकरे म्हणाले की, त्यांना पोलीस संरक्षण असले, तरी त्यांच्या सर्व चालकांना कितीही घाई असली तरी सिग्नल मोडायचा नाही, अशी सक्त ताकीद दिलेली आहे. वाहतुकीचे नियम पाळणे ही प्रत्येकाची जबाबदारी असून, नियमांचे पालन केल्यास रस्त्यांवरील शिस्त राखण्यास मदत होईल, असा संदेश त्यांनी दिला. ई-चलानच्या मुद्द्यावर बोलताना त्यांनी दंड आकारण्याच्या पद्धतीची तपासणी करण्याची मागणी केली. नियमभंगावर कारवाई करण्यास विरोध नसला, तरी ती प्रक्रिया योग्य आणि पारदर्शक पद्धतीने राबवली जाते का, हे तपासणे गरजेचे असल्याचे त्यांनी स्पष्ट केले. ‘महाराष्ट्र माझ्या हातात सत्ता कधी देतोय, याची वाट पाहतोय’ राज्यातील वाहतूक व्यवस्थेसह विविध प्रश्नांवर भाष्य करताना राज ठाकरे यांनी सत्तेची संधी मिळण्याची अपेक्षाही व्यक्त केली. महाराष्ट्रातील वाहतूक व्यवस्थेला शिस्त लावण्यासाठी रॉकेट सायन्सची गरज नाही; त्यासाठी फक्त इच्छाशक्ती आवश्यक आहे, असे ते म्हणाले. महाराष्ट्राची सत्ता आपल्या हातात कधी येते, याची आपण वाट पाहत असल्याचे सांगत त्यांनी आपल्या राजकीय महत्त्वाकांक्षेचे संकेत दिले.
———————– हेही वाचा.. मध्य रेल्वे कोलमडली! कांजूरमार्गमध्ये सिग्नल केबिनला आग: 5 तासांपासून वाहतूक ठप्प; रविवारी मेगाब्लॉक घेऊनही सोमवारी मोठा बिघाड कुर्मगती कारभार, रोज उशिराने धावणाऱ्या ट्रेन आणि वारंवार होणाऱ्या तांत्रिक बिघाडांसाठी कुप्रसिद्ध असलेल्या मध्य रेल्वेच्या गलथानपणाचा सोमवारी पुन्हा एकदा कळस पाहायला मिळाला. आठवड्याच्या पहिल्याच दिवशी सकाळी 10 वाजता मध्य रेल्वेमार्गावरील सिग्नल यंत्रणेत मोठा बिघाड झाला. दुपारचे दोन वाजले तरी रेल्वे प्रशासनाला हा बिघाड दुरुस्त करता न आल्याने गेल्या पाच तासांपासून मध्य रेल्वेची अप आणि डाऊन दिशेची धीम्या तसेच जलद मार्गावरील वाहतूक पूर्णपणे कोलमडली आहे. सविस्तर वाचा
Source link
महाराष्ट्र माझ्या हातात सत्ता कधी देतोय याची वाट बघतोय:शिस्त लावायला रॉकेट सायन्स लागत नाही, इच्छाशक्ती हवी- राज ठाकरे
