राज्यभर FDA ची धडक कारवाई:13 जणांना अटक, 1.09 कोटींचा मुद्देमाल जप्त; मुंबईतील 10 अन्न आस्थापनांचे परवाने निलंबित

अन्नसुरक्षेच्या दृष्टीने अन्न व औषध प्रशासनाने (FDA) प्रतिबंधित अन्नपदार्थांची विक्री, साठवणूक आणि वाहतूक रोखण्यासाठी राज्यभर विशेष मोहीम राबवली आहे. या मोहिमेअंतर्गत राज्यात आतापर्यंत 12 गुन्हे दाखल करण्यात आले असून, 13 जणांना अटक करण्यात आली आहे. या कारवाईत प्रतिबंधित अन्नपदार्थांचा सुमारे 79.29 लाख रुपयांचा साठा आणि तीन वाहने जप्त करण्यात आली आहेत. एकूण जप्त केलेल्या मुद्देमालाची किंमत सुमारे 1.09 कोटी रुपये असल्याची माहिती अन्न व औषध प्रशासनाने दिली. मुंबईतील 10 अन्न आस्थापनांची तपासणी केली असता परवाने आणि नोंदणीसंदर्भातील त्रुटी आढळून आल्या. तसेच, अस्वच्छता, वैद्यकीय प्रमाणपत्रांचा अभाव, अन्न हाताळणीसंबंधी प्रशिक्षण नसणे, कीटकांचा प्रादुर्भाव आणि अन्नपदार्थांच्या साठवणुकीतील त्रुटीही निदर्शनास आल्या. या अनियमिततांमुळे संबंधित आस्थापनांचे परवाने निलंबित करण्यात आले आहेत. नामांकित आस्थापनांवरही कारवाई कारवाई करण्यात आलेल्या आस्थापनांमध्ये इस्लाम जिमखान्यातील हुमा केटरर, कांदिवलीतील मिल्कोज डेअरी प्रॉडक्ट्स, सांताक्रूझमधील ला पिनोझ पिझ्झा, विलेपार्लेतील एफथ्री कॉर्पोरेट हॉस्पिटॅलिटी सर्व्हिसेस, ऑपेरा हाऊसमधील नारायण डोसा, जे. जे. रुग्णालय परिसरातील सेंट्रल कॅन्टीन, चारकोपमधील पालीवाल डेअरी आणि मरीन लाइन्स परिसरातील नवाब ज्यूस सेंटर यांचा समावेश आहे. या आस्थापनांमधील त्रुटींच्या पार्श्वभूमीवर प्रशासनाने कारवाई केली आहे. उत्तर महाराष्ट्रात 23 लाखांचा साठा जप्त जळगाव, धुळे आणि नाशिक येथे 6 ते 8 ऑक्टोबरदरम्यान करण्यात आलेल्या कारवाईत 23.24 लाख रुपयांचा प्रतिबंधित अन्नपदार्थांचा साठा जप्त करण्यात आला. या प्रकरणांमध्ये चार एफआयआर दाखल करण्यात आले असून, पाच जणांना अटक करण्यात आली आहे. प्रतिबंधित अन्नपदार्थांची विक्री आणि वाहतूक रोखण्यासाठी प्रशासनाकडून तपासणी आणि कारवाई तीव्र करण्यात आली आहे. नंदुरबारमध्ये 69 लाखांचा मुद्देमाल जप्त 8 ऑक्टोबर रोजी नंदुरबार येथे गोपनीय माहितीच्या आधारे प्रतिबंधित गुटखा आणि पानमसाल्याची वाहतूक करणाऱ्यांविरोधात कारवाई करण्यात आली. या कारवाईत एकूण 69.47 लाख रुपयांचा मुद्देमाल जप्त करण्यात आला. प्रतिबंधित पदार्थांची वाहतूक आणि वितरण रोखण्यासाठी संबंधित यंत्रणांकडून विशेष लक्ष दिले जात आहे. कोकण, पुणे आणि इतर विभागांतही कारवाई कोकण विभागात तीन आस्थापनांच्या तपासणीत 10.88 लाख रुपयांचा प्रतिबंधित अन्नपदार्थांचा साठा जप्त करण्यात आला. या प्रकरणी तिघांना, तर पुण्यात एका व्यक्तीला अटक करण्यात आली. छत्रपती संभाजीनगर विभागात 4.41 लाख रुपयांचा आणि नागपूर विभागात 1.24 लाख रुपयांचा प्रतिबंधित साठा जप्त करण्यात आला. राज्यभर सुरू असलेल्या या मोहिमेतून प्रतिबंधित अन्नपदार्थांची विक्री, साठवणूक आणि वाहतूक रोखण्याचा प्रशासनाचा प्रयत्न आहे. निकृष्ट अन्नपदार्थ आणि भेसळीविरोधात कारवाई प्रतिबंधित अन्नपदार्थांव्यतिरिक्त निकृष्ट दर्जा, भेसळीचा संशय आणि चुकीचे लेबलिंग यांसारख्या त्रुटींवरही अन्न व औषध प्रशासनाने कारवाई केली आहे. कोकण, पुणे, नागपूर आणि अमरावती विभागांत एकूण 53 हजार 726 किलो अन्नपदार्थ, तसेच 6 हजार 98 लीटर दूध आणि ताडीवर कारवाई करण्यात आली. या सर्व साठ्याची एकत्रित किंमत सुमारे 1.39 कोटी रुपये असल्याची माहिती प्रशासनाने दिली. दूध, ताडी, भगर आणि तेलाचे नमुने तपासणीच्या कक्षेत पुणे जिल्ह्यातील एका दूध संकलन केंद्रातील 1 हजार 484 लीटर दुधाची आम्लता चाचणी सकारात्मक आढळली. सांगली जिल्ह्यातील दफळापूर येथे असुरक्षिततेचा संशय आल्याने 18 लीटर ताडीवर कारवाई करण्यात आली. नागपूरमधील इतवारी येथे पॅकेजिंग आणि लेबलिंगच्या नियमांचे उल्लंघन आढळल्याने 538 किलो भगर, तर अमरावती जिल्ह्यातील वणी येथे भेसळीच्या संशयावरून 763.40 किलो पॅकबंद रिफाइंड तेल जप्त करण्यात आले. अन्नपदार्थांची गुणवत्ता आणि सुरक्षितता सुनिश्चित करण्यासाठी प्रशासनाकडून ही कारवाई करण्यात आली.



Source link