साखर कामगारांच्या मागण्यांसाठी मुख्यमंत्र्यांच्या उपस्थितीत संयुक्त बैठक होणार:आकाश फुंडकरांचे आश्वासन, बेमुदत संप तूर्त स्थगित

साखर उद्योगातील कामगारांच्या विविध प्रलंबित मागण्यांवर तोडगा काढण्यासाठी मुख्यमंत्र्यांच्या उपस्थितीत सहकार व कामगार विभागाची संयुक्त बैठक लवकरच आयोजित करण्यात येणार आहे. या बैठकीत सहकारी साखर कारखान्यांचे प्रतिनिधी आणि कामगार संघटनांचे पदाधिकारी सहभागी होणार असून, कामगारांच्या प्रश्नांवर सकारात्मक विचार करून मार्ग काढण्याचे आश्वासन कामगार मंत्री आकाश फुंडकर यांनी दिले आहे. या आश्वासनानंतर महाराष्ट्र राज्य साखर कामगार महासंघाच्या वतीने 22 ऑक्टोबर 2026 पासून पुकारण्यात आलेला बेमुदत संप तूर्तास स्थगित करण्यात आल्याची घोषणा करण्यात आली. महाराष्ट्र राज्य साखर कामगार महासंघ, अहमदनगर आणि महाराष्ट्र राज्य साखर कामगार प्रतिनिधी मंडळ, पुणे या संघटनांनी साखर उद्योगातील कामगारांच्या विविध मागण्यांसंदर्भात शासनाकडे निवेदन सादर केले होते. या निवेदनाच्या अनुषंगाने कामगार मंत्री आकाश फुंडकर यांच्या अध्यक्षतेखाली बैठक आयोजित करण्यात आली. या बैठकीत कामगारांच्या प्रलंबित प्रश्नांवर सविस्तर चर्चा करण्यात आली. संबंधित प्रश्न सोडविण्यासाठी विविध विभागांमध्ये समन्वय साधून पुढील कार्यवाही करण्याची भूमिका यावेळी मांडण्यात आली. थकीत वेतनासह विविध मागण्यांवर तोडगा काढण्याची मागणी साखर उद्योगातील कामगारांचे अनेक प्रश्न प्रलंबित असून, त्यावर तातडीने निर्णय घेण्याची मागणी कामगार संघटनांनी केली आहे. कामगारांचे थकीत वेतन अदा करणे, बंद आणि आजारी साखर कारखाने पुन्हा सुरू करणे, कारखाने बंद पडल्यामुळे अडचणीत आलेल्या कामगारांचे पुनर्वसन करणे, तसेच कायमस्वरूपी आणि कंत्राटी कामगारांच्या वेतनासंबंधी प्रश्न मार्गी लावणे, या प्रमुख मागण्यांचा निवेदनात समावेश आहे. याशिवाय साखर उद्योगातील कामगारांना विविध शासकीय योजनांचा लाभ मिळवून देण्याची मागणीही संघटनांनी केली आहे. महाराष्ट्र औद्योगिक संबंध अधिनियम, 1946 पूर्ववत लागू करावा, अशी मागणीदेखील कामगार संघटनांकडून करण्यात आली आहे. या मागण्यांबाबत शासनाने सकारात्मक भूमिका घेऊन कामगारांना दिलासा द्यावा, अशी संघटनांची अपेक्षा आहे. सहकार आणि कामगार विभागामध्ये समन्वय साधणार कामगारांच्या मागण्यांपैकी काही प्रश्न सहकार विभाग, साखर आयुक्तालय आणि कामगार आयुक्तालय यांच्या कार्यक्षेत्राशी संबंधित आहेत. त्यामुळे सर्व मागण्यांवर एकाच स्तरावर निर्णय घेण्याऐवजी संबंधित विभागांनी आपापल्या अधिकारक्षेत्रातील प्रश्नांचा आढावा घेऊन समन्वयाने कार्यवाही करणे आवश्यक असल्याचे बैठकीत स्पष्ट करण्यात आले. यासाठी मुख्यमंत्र्यांच्या उपस्थितीत उच्चस्तरीय संयुक्त बैठक आयोजित केली जाणार आहे. या बैठकीत संबंधित शासकीय विभागांचे अधिकारी, सहकारी साखर कारखान्यांचे प्रतिनिधी आणि कामगार संघटनांचे पदाधिकारी सहभागी होतील. कामगारांच्या मागण्यांवर सविस्तर चर्चा करून त्यातून मार्ग काढण्याचा प्रयत्न केला जाणार आहे. या बैठकीत नेमके कोणते निर्णय होतात आणि कामगारांच्या मागण्यांवर कितपत कार्यवाही होते, याकडे साखर उद्योगातील कामगारांचे लक्ष लागले आहे. 7 सहकारी आणि 3 खासगी कारखान्यांतील कामगार संपात सहभागी साखर उद्योगातील कामगारांच्या प्रलंबित मागण्यांसाठी 22 ऑक्टोबर 2026 पासून राज्यात बेमुदत संप पुकारण्यात आला होता. या संपात राज्यातील सुमारे 7 सहकारी आणि 3 खासगी साखर कारखान्यांतील कामगार सहभागी झाले होते. प्रलंबित प्रश्नांवर शासनाने ठोस भूमिका घ्यावी आणि मागण्यांवर निर्णय घ्यावा, अशी कामगार संघटनांची भूमिका होती. दरम्यान, कामगार मंत्री आकाश फुंडकर यांच्या अध्यक्षतेखाली झालेल्या बैठकीत मागण्यांवर सकारात्मक चर्चा करण्यात आली. तसेच कामगारांच्या प्रश्नांवर तोडगा काढण्यासाठी लवकरच उच्चस्तरीय बैठक आयोजित करण्याचे आश्वासन देण्यात आले. या पार्श्वभूमीवर साखर कामगार महासंघाने बेमुदत संप तूर्तास स्थगित करण्याची घोषणा केली आहे. बैठकीला विविध अधिकारी आणि संघटनांचे पदाधिकारी उपस्थित या बैठकीला आमदार विनय कोरे, कामगार विभागाचे उपसचिव (कामगार-2) स्वप्नील कापडणीस, अतिरिक्त कामगार आयुक्त भास्कर मामोरडे यांच्यासह महाराष्ट्र राज्य साखर कामगार महासंघ आणि महाराष्ट्र राज्य साखर कामगार प्रतिनिधी मंडळाचे पदाधिकारी उपस्थित होते. संयुक्त बैठकीच्या माध्यमातून साखर कामगारांच्या प्रलंबित प्रश्नांवर चर्चा होऊन त्यावर ठोस निर्णय घेतले जातात का, याकडे आता कामगार संघटनांचे लक्ष असेल. संप स्थगित करण्यात आला असला, तरी थकीत वेतन, बंद कारखाने, पुनर्वसन आणि वेतनविषयक मागण्यांवर प्रत्यक्ष कार्यवाही झाल्यानंतरच कामगारांना दिलासा मिळण्याची अपेक्षा आहे. हेही वाचा… नाशिकमध्ये 28 वर्षीय इंजिनीअरची आत्महत्या:प्रेमसंबंधातील दुरावा, पैशांचा वाद आणि मारहाणीच्या त्रासाने पवन हताश नाशिकमध्ये एका 28 वर्षीय तरुण इंजिनीअरने मानसिक त्रासाला कंटाळून आत्महत्या केल्याची घटना समोर आली आहे. पवन राजेंद्र पाटील असे मृत तरुणाचे नाव असून, तो काही महिन्यांपूर्वीच नाशिकमधील एका खासगी कंपनीत नोकरीला लागला होता. प्रेमसंबंधातील दुरावा, तरुणीला दिलेल्या पैशांवरून निर्माण झालेला तणाव, तसेच काही तरुणांकडून झालेली कथित मारहाण आणि धमक्यांमुळे तो मानसिकदृष्ट्या खचला होता, अशी माहिती समोर आली आहे. या प्रकरणी पवनच्या वडिलांनी दिलेल्या तक्रारीवरून पोलिसांनी दोन तरुणींसह चार जणांविरुद्ध गुन्हा दाखल केला आहे. सविस्तर वाचा….



Source link