एकीकडे देशाला ‘विकसित राष्ट्र’ बनवण्याच्या मोठमोठ्या घोषणा आणि दावे केले जात असताना, दुसरीकडे देशातील आणि राज्यातील आरोग्य व्यवस्था किती पोखरलेली आणि तकलादू आहे, याचे अत्यंत संतापजनक आणि विदारक चित्र अकोल्यात समोर आले आहे. अकोला जिल्हा सर्वोपचार रुग्णालयातील अनागोंदी आणि अमानवीय कारभाराचा एक हृदय हेलावून टाकणारा व्हिडिओ सध्या सोशल मीडियावर प्रचंड व्हायरल होत आहे. रुग्णालयात वेळेवर स्ट्रेचर न मिळाल्यामुळे, एका हतबल पत्नीला ‘ब्रेन स्ट्रोक’ आलेल्या आपल्या आजारी पतीला थेट पाठीवर उचलून उपचारासाठी रुग्णालयाच्या एका कक्षातून दुसऱ्या कक्षात धावपळ करावी लागल्याचा धक्कादायक प्रकार घडला आहे. मिळालेल्या माहितीनुसार, संबंधित महिलेच्या पतीला अचानक ब्रेन स्ट्रोक आल्यामुळे तिने अत्यंत आशेने आणि घाईघाईने त्याला अकोल्याच्या जिल्हा सर्वोपचार शासकीय रुग्णालयात आणले होते. अशा गंभीर परिस्थितीत रुग्णाला तातडीने स्ट्रेचर मिळणे आवश्यक होते. मात्र, रुग्णालयातील कर्मचाऱ्यांची उदासीनता आणि अव्यवस्थेमुळे या महिलेला तातडीने स्ट्रेचर उपलब्ध करून देण्यात आले नाही. हृदय हेलावून टाकणारा पत्नीचा संघर्ष पतीची खालावत चाललेली प्रकृती पाहून आणि वेळेचे गांभीर्य ओळखून, पत्नीने कोणाचीही मदत न मिळाल्याने अखेर स्वतःच पुढाकार घेतला. एका बाजूला गळात स्वतःची बॅग बांधलेली आणि पाठीवर पूर्णपणे अचेतन झालेल्या पतीला घेतले, अशा अत्यंत विदारक अवस्थेत ती महिला रुग्णालयाच्या आवारात डॉक्टर्स, नर्स आणि आयसीयू (ICU) कक्षाचा शोध घेत धावपळ करत होती. पतीचा जीव वाचवण्यासाठी या पत्नीने केलेला हा थरारक आणि वेदनादायी संघर्ष पाहून उपस्थितांचे डोळे पाणावले. शासकीय रुग्णालयातील त्रुटी पुन्हा चव्हाट्यावर या संपूर्ण अमानुष प्रकाराचा व्हिडिओ रुग्णालयातीलच एका सजग नागरिकाने आपल्या मोबाईल कॅमेऱ्यात कैद केला आणि तो सोशल मीडियावर पोस्ट केला. हा व्हिडिओ व्हायरल होताच शासकीय रुग्णालयातील त्रुटी पुन्हा चव्हाट्यावर आल्याचे पाहायला मिळाले. कोट्यवधी रुपयांचा निधी मिळूनही गरिबांच्या हक्काच्या शासकीय रुग्णालयात साधा एक स्ट्रेचर वॉर्डबॉयसह वेळेवर उपलब्ध होऊ नये, याबद्दल तीव्र संताप व्यक्त केला जात आहे. यापूर्वीही राज्यातील अनेक सरकारी रुग्णालयांमध्ये औषधांचा तुटवडा आणि अपुऱ्या सोयी-सुविधांमुळे रुग्णांना जीव गमवावा लागल्याच्या घटना ताज्या असताना, अकोल्यातील या घटनेने त्यात आणखी एका काळ्या अध्यायाची भर घातली आहे. प्रशासनाविरोधात जनतेमध्ये तीव्र रोष या संतापजनक प्रकारानंतर अकोला जिल्हा रुग्णालय प्रशासनाच्या ढिसाळ कारभारावर सर्वसामान्य नागरिकांमधून आणि सामाजिक संघटनांमधून तीव्र संताप व्यक्त केला जात आहे. “अशा संवेदनाहीन डॉक्टर आणि कर्मचाऱ्यांवर तात्काळ निलंबनाची कारवाई करण्यात यावी,” अशी मागणी जोर धरू लागली आहे. या प्रकरणावर आता वरिष्ठ आरोग्य अधिकारी आणि लोकप्रतिनिधी काय पावले उचलतात? याकडे सर्वांचे लक्ष लागले आहे. मात्र, या घटनेने डिजिटल भारताच्या ‘आरोग्य’ प्रतिमेला मोठा तडा दिला आहे, हे मात्र नक्की.
Source link
हृदय हेलावून टाकणारा पत्नीचा संघर्ष:स्ट्रेचर न मिळाल्याने आजारी पतीला पाठीवर वाहण्याची, अकोला जिल्हा रुग्णालयातील प्रकार
