पेपरफुटी, बेरोजगारी, शिक्षकांवरील अशैक्षणिक कामांचा भार आणि आंदोलनांवरील कारवाई या मुद्द्यांवरून महाविकास आघाडीने राज्य सरकारला घेरण्याची तयारी केली आहे. देशात अघोषित आणीबाणी सुरू असून, सरकारविरोधातील संताप व्यक्त करण्याची हीच योग्य वेळ आहे, असा आरोप महाविकास आघाडीच्या नेत्यांनी केला. पुणे पदवीधर मतदारसंघातील हर्षदा देशमुख-जाधव आणि शिक्षक मतदारसंघातील जयंत आसगावकर यांना विजयी करण्याचे आवाहन कोल्हापुरातील प्रचार मेळाव्यात करण्यात आले. कोल्हापूर जिल्हा काँग्रेस कमिटीच्या वतीने आयोजित मेळाव्यात राष्ट्रवादी काँग्रेसचे नेते जयंत पाटील, काँग्रेसचे आमदार सतेज पाटील, स्वाभिमानी शेतकरी संघटनेचे अध्यक्ष राजू शेट्टी, राष्ट्रवादी काँग्रेसचे प्रदेशाध्यक्ष शशिकांत शिंदे आणि माजी मंत्री हर्षवर्धन पाटील यांनी सरकारवर टीका केली. जयंत पाटील म्हणाले, जयंत आसगावकर यांनी आमदार म्हणून उत्कृष्ट काम केले असून, त्यांचा जनसंपर्क दांडगा आहे. हर्षदा देशमुख-जाधव या उच्चशिक्षित असून पदवीधरांच्या प्रश्नांना न्याय देतील. तरुणांचे भविष्य पेपरफुटीमुळे धोक्यात आले आहे. त्यामुळे दोन्ही उमेदवारांना विधान परिषदेत पाठवावे. सतेज पाटील यांनी आसगावकर यांनी शंभर टक्के निधी शिक्षण आणि शाळांसाठी खर्च केल्याचे सांगितले. जुन्या पेन्शनचा मुद्दा कोल्हापुरातील मोर्चातून पुढे आला. तरुणांच्या अपेक्षा पूर्ण करण्यासाठी हर्षदा सक्षम उमेदवार आहेत, असे ते म्हणाले. महाविकास आघाडी म्हणून आपली भूमिका कायम असून, हर्षदा यांना शंभर टक्के सहकार्य राहील. ३० ऑक्टोबरला दोन्ही उमेदवारांचा आमदार म्हणून याच कोल्हापुरात सत्कार होईल, असा विश्वासही त्यांनी व्यक्त केला. राजू शेट्टी यांनी भाजपवर हुकूमशाहीचा आरोप करत परिवर्तनाची सुरुवात पुरोगामी कोल्हापुरातून होईल, असे म्हटले. शशिकांत शिंदे यांनीही ही लढाई परिवर्तनाची असल्याचे सांगितले. हर्षवर्धन पाटील यांनी शेती, शिक्षण आणि तरुणांच्या भविष्यासाठी या निवडणुका महत्त्वाच्या असल्याचे नमूद केले. हर्षदा देशमुख-जाधव यांनी पदवीधरांना रोजगार आणि शिक्षकांना अशैक्षणिक कामांच्या ओझ्यातून दिलासा देण्याची गरज व्यक्त केली. तर जयंत आसगावकर यांनी शिक्षक आणि शिक्षणाच्या सेवेत कायम कार्यरत राहण्याची ग्वाही दिली. मेळाव्याला महाविकास आघाडीचे पदाधिकारी आणि कार्यकर्ते मोठ्या संख्येने उपस्थित होते.
Source link
महाविकास आघाडी सरकारला घेरणार: पेपरफुटी, बेरोजगारीवरून हल्लाबोल:पदवीधर-शिक्षक मतदारसंघासाठी कोल्हापुरातून परिवर्तनाचे रणशिंग फुंकले
