आखाडा बाळापूरमध्ये भीषण आग:नवीन बसस्थानकासमोरील सहा दुकाने जळून खाक, साडी सेंटर अन् शूज सेंटरसह लाखोंचे नुकसान

हिंगोली जिल्ह्यातील कळमनुरी तालुक्यातील आखाडा बाळापूर येथे गुरुवारी रात्री भीषण आग लागल्याची घटना घडली. नवीन बसस्थानकासमोरील सहा दुकानांना आगीने वेढल्याने दुकानांमधील साहित्य जळून खाक झाले. या दुर्घटनेत व्यापाऱ्यांचे लाखो रुपयांचे नुकसान झाल्याचा प्राथमिक अंदाज व्यक्त केला जात आहे. रात्री साडेनऊ वाजण्याच्या सुमारास ही घटना घडली. आगीचे नेमके कारण अद्याप स्पष्ट झाले नसले, तरी शॉर्टसर्किटमुळे आग लागली असावी, अशी शक्यता वर्तवण्यात येत आहे. आखाडा बाळापूर येथील नवीन बसस्थानकासमोरील परिसरात ही सहा दुकाने आहेत. यामध्ये शिंदे यांच्या मालकीची चार कटिंगची दुकाने, शंकर सूर्यवंशी यांचे साडी सेंटर आणि सय्यद शौकत यांचे शूज सेंटर यांचा समावेश आहे. गुरुवारी रात्री सर्व दुकानदार नेहमीप्रमाणे आपापली दुकाने बंद करून घरी गेले होते. त्यानंतर रात्री साडेनऊच्या सुमारास एका दुकानातून अचानक धूर बाहेर येऊ लागला. काही वेळातच धुराचे प्रमाण वाढले आणि दुकानांमधून आगीचे मोठमोठे लोळ बाहेर पडू लागले. दुकानांना आग लागल्याचे लक्षात येताच परिसरातील नागरिकांनी घटनास्थळी धाव घेतली. सुरुवातीला नागरिकांनी उपलब्ध साहित्याच्या मदतीने पाणी टाकून आग विझविण्याचा प्रयत्न केला. मात्र, दुकानांमध्ये असलेले कपडे, साड्या आणि शूज सेंटरमधील रबराचे साहित्य यामुळे आगीने वेगाने पेट घेतला. त्यामुळे काही वेळातच आगीने आजूबाजूच्या दुकानांनाही आपल्या विळख्यात घेतले. परिस्थिती गंभीर होत असल्याचे लक्षात येताच नागरिकांनी दुकानांचे शटर तोडून आग विझविण्याचे प्रयत्न केले. मात्र, आगीची तीव्रता अधिक असल्याने नागरिकांचे प्रयत्न अपुरे पडले. त्यानंतर कळमनुरी आणि हिंगोली नगरपालिकेच्या अग्निशामक दलाला पाचारण करण्यात आले. दरम्यान, रात्री साडेदहा वाजण्याच्या सुमारास कळमनुरी येथील अग्निशामक दल घटनास्थळी दाखल झाले. जवानांनी आगीवर नियंत्रण मिळविण्यासाठी प्रयत्न सुरू केले. घटनेची माहिती मिळताच आखाडा बाळापूर पोलिसांनीही घटनास्थळी धाव घेतली. परिसरात नागरिकांची मोठी गर्दी झाल्याने पोलिसांनी परिस्थिती हाताळत मदतकार्य सुरू केले. या आगीत सहाही दुकानांमधील साहित्याचे मोठ्या प्रमाणावर नुकसान झाले आहे. दुकानदारांनी व्यवसायासाठी ठेवलेले साहित्य आगीत जळून खाक झाल्याने त्यांच्यासमोर आर्थिक संकट निर्माण झाले आहे. प्राथमिक अंदाजानुसार या घटनेत लाखो रुपयांचे नुकसान झाले असावे, अशी भीती व्यक्त केली जात आहे. दरम्यान, आगीचे नेमके कारण अद्याप समोर आलेले नाही. शॉर्टसर्किटमुळे आग लागली असावी, असा प्राथमिक अंदाज व्यक्त केला जात असला तरी अधिकृत कारण स्पष्ट होणे बाकी आहे. अग्निशामक दलाच्या प्रयत्नांनंतर आगीवर नियंत्रण मिळविण्याचे काम सुरू होते. या घटनेमुळे आखाडा बाळापूरमधील व्यापारी वर्गात चिंतेचे वातावरण निर्माण झाले आहे. हेही वाचा…. अजितदादा जिवंत असेपर्यंत विलीनीकरणाची चर्चा सुरू होती:निधनानंतर विषय संपला, सुप्रिया सुळेंनी भूमिका केली स्पष्ट महाराष्ट्राच्या राजकारणात सध्या राष्ट्रवादी काँग्रेसच्या दोन्ही गटांच्या संभाव्य विलीनीकरणाचा मुद्दा पुन्हा एकदा चर्चेच्या केंद्रस्थानी आला आहे. दिवंगत उपमुख्यमंत्री अजित पवार यांच्या निधनानंतर राष्ट्रवादी काँग्रेसच्या राजकारणात अनेक घडामोडी घडत असून, दोन्ही पक्षांतील नेत्यांच्या भेटीगाठी आणि विधानांमुळे एकत्रीकरणाच्या चर्चांना अधिकच बळ मिळत आहे. अशातच खासदार सुप्रिया सुळे यांनी माध्यमांशी संवाद साधत या संपूर्ण विषयावर आपली भूमिका मांडली आहे. सविस्तर वाचा….



Source link