Headlines

तमिळ गाणे ‘वरुवाई’ला ग्रॅमी नामांकन:इतिहास घडवणारा पहिला तमिळ ट्रॅक; 100 वर्षे जुन्या कवितेवर आधारित गाणे




चेन्नईचे संगीतकार-गायक देवन एकंबरम आणि गायिका सुशा यांच्या तमिळ गाण्याला ‘वरुवाई’ला ग्रॅमी नामांकन मिळाले आहे. 69व्या ग्रॅमी पुरस्कार 2027च्या नामांकन यादीत ‘वरुवाई’ची ‘सर्वोत्कृष्ट ग्लोबल म्युझिक परफॉर्मन्स’ या श्रेणीत निवड झाली आहे. ग्रॅमीच्या इतिहासात नामांकन मिळवणारे हे पहिले तमिळ गाणे आहे. तसेच, 2027च्या ग्रॅमी पुरस्कारांमध्ये ही भारताची एकमेव अधिकृत प्रवेशिकाही आहे. महाकवी सुब्रमण्यम भारती यांच्या 100 वर्षे जुन्या कवितेवर आधारित हे गाणे कोणत्याही रेकॉर्ड लेबलशिवाय रिलीज करण्यात आले होते. गायक म्हणाले- लॉटरीचे तिकीट जिंकल्यासारखा अनुभव जवळपास तीन दशकांपासून संगीत क्षेत्रात सक्रिय असलेले भारतीय-अमेरिकी संगीतकार आणि पार्श्वगायक देवन एकंबरम यांनी इन्स्टाग्राम पोस्टद्वारे आपला आनंद व्यक्त केला. त्यांनी लिहिले की, हा केवळ त्यांच्यासाठी आणि सुशासाठीच नव्हे, तर तमिळ संगीत आणि महाकवी भारती यांच्या रचनेसाठीही अभिमानाचा क्षण आहे. माध्यमांशी बोलताना देवन यांनी सांगितले की, या श्रेणीत ५२६ प्रवेशिकांमध्ये अनेक मोठी नावे समाविष्ट होती, त्यामुळे आपली निवड होण्याची शक्यता त्यांना केवळ ५० टक्केच वाटत होती. देवन यांच्या म्हणण्यानुसार, ग्रॅमी नामांकनासाठी मार्केटिंगवर किमान २०,००० डॉलर्स (सुमारे १८.७० लाख रुपये) खर्च करावे लागतील, असे त्यांना सांगण्यात आले होते. मात्र, त्यांनी कोणतीही सशुल्क मोहीम राबवली नाही आणि संपूर्ण प्रचार केवळ इन्स्टाग्रामच्या माध्यमातून केला. ही कामगिरी लॉटरीचे तिकीट जिंकल्यासारखी असल्याचे सांगत त्यांनी म्हटले की, आता ते आयुष्यभरासाठी ग्रॅमी नामांकित झाले आहेत आणि हा सन्मान त्यांच्याकडून कोणीही हिरावून घेऊ शकत नाही. १०० वर्षांपूर्वी ब्रिटिश राजवटीत लिहिले गेले होते हे कृष्णभजन ग्रॅमीपर्यंत पोहोचलेल्या ‘वरुवाई’ गाण्याची पार्श्वभूमी खास आहे. या गीताचे बोल तमिळ महाकवी सुब्रमण्यम भारती अर्थात भारथियार यांनी सुमारे १०० वर्षांपूर्वी ब्रिटिश राजवटीच्या काळात लिहिले होते. त्यांनी हे भगवान श्रीकृष्णाला समर्पित भजन म्हणून रचले होते. या कवितेत कवी भगवान कृष्णाला साद घालत आपल्या जीवनातील अंधार दूर करण्याची प्रार्थना करतात. तसेच, ते श्रीकृष्णाला समाजातील वाईट गोष्टींचा नाश करून योग्य मार्ग दाखवण्याची विनंती करतात. देवन एकंबरम यांनी पारंपरिक भक्तिकाव्याला आधुनिक संगीताशी जोडून त्याला एक नवे रूप दिले आहे. शास्त्रीय संगीताच्या ‘राग देस’वर आधारित या रचनेत पारंपरिक भावभावना आणि समकालीन चालींचा सुंदर समतोल पाहायला मिळतो. महाकवी सुब्रमण्यम भारती कोण होते, ज्यांच्या रचनेमुळे भारताला ग्रॅमी नामांकन मिळाले? तमिळ साहित्य आणि भारतीय स्वातंत्र्यलढ्याच्या इतिहासात महाकवी सुब्रमण्यम भारती यांचे विशेष स्थान आहे. स्वातंत्र्यलढ्याच्या काळात त्यांनी आपल्या ओजस्वी कविता आणि लेखांद्वारे सर्वसामान्य जनतेमध्ये ब्रिटिश राजवटीविरोधात जागरूकता निर्माण करण्याचे काम केले. त्यांच्या रचनांनी लोकांना अन्याय आणि गुलामगिरीविरोधात आवाज उठवण्याची प्रेरणा दिली. सुब्रमण्यम भारती यांच्या लेखनाचे सर्वात मोठे वैशिष्ट्य म्हणजे त्यात ईश्वराविषयीची गाढ भक्ती आणि मातृभूमीविषयीची देशभक्ती यांचा अनोखा संगम पाहायला मिळत असे. आपल्या कवितांच्या माध्यमातून त्यांनी नेहमी स्वातंत्र्य, सामाजिक समानता आणि समाजसुधारणेचा संदेश दिला.



Source link

Leave a Reply

Your email address will not be published. Required fields are marked *