![]()
मोर्शीतील रामजीबाबानगर परिसरात ५० वर्षीय शेतकरी निळकंठ केशवराव मोहोड यांनी कर्ज आणि नापिकीमुळे आत्महत्या केली. शनिवारी, २१ नोव्हेंबरच्या सकाळी ही घटना उघडकीस आली. त्यांनी राहत्या घरातील खोलीत दोरीने गळफास घेतला. पोलीस सूत्रांनुसार, मोहोड यांची सावरखेडच्या शिवारात चार एकर कोरडवाहू शेती होती. यंदा त्यांनी तूर, कापूस आणि सोयाबीनची पेरणी केली होती. या पिकांसाठी त्यांनी बँका आणि मायक्रोफायनान्स कंपनीकडून कर्ज घेतले होते. यंदा कमी पावसामुळे मोर्शी तालुक्यात दुष्काळी परिस्थिती निर्माण झाली. शेतातील कापूस आणि सोयाबीनची पिके सुकून खराब झाली. काम मिळणेही कठीण झाल्याने कर्ज कसे फेडायचे, याची चिंता त्यांना होती. नवीन कर्जासाठी ते बँकेत जात होते, मात्र त्यांना प्रतिसाद मिळाला नाही. घटनेच्या वेळी घरातील सर्व जण झोपले होते. पहाटे घटना लक्षात आल्यानंतर मोर्शी पोलिसांना फोनवरून माहिती देण्यात आली. ठाणेदार राहुल आठवले यांच्या मार्गदर्शनाखाली पोलिसांनी घटनास्थळी जाऊन मृतदेह खाली उतरवला आणि पंचनामा केला. उपजिल्हा रुग्णालयाच्या वैद्यकीय अधीक्षकांनी शवविच्छेदन केल्यानंतर मृतदेह नातेवाइकांच्या ताब्यात दिला. त्यांच्या पश्चात वृद्ध आई-वडील, पत्नी, दोन मुले आणि भाऊ असा परिवार आहे.
Source link
कर्ज आणि नापिकीमुळे शेतकऱ्याने आत्महत्या केली:मोर्शीतील 50 वर्षीय निळकंठ मोहोड यांनी घरात गळफास घेतला; चार एकर कोरडवाहू शेती होती