राजकीय वादात रश्मी वहिनींना ओढल्यास रस्त्यावर उतरू!:ठाण्यातील 'शूटर गँग' ते मतदार यादीतील SIR घोटाळ्यावरून किशोरी पेडणेकर आक्रमक

ठाण्यातील शिवसेना (उद्धव बाळासाहेब ठाकरे) पक्षाचे विभागप्रमुख प्रदीप ऊर्फ बाळू पूर्णेकर यांच्या हत्येवरून राज्यातील राजकीय वातावरण तापलेले असतानाच, या वादात वारंवार रश्मी ठाकरे यांचे नाव ओढण्यावरून मुंबईच्या माजी महापौर किशोरी पेडणेकर यांनी सत्ताधारी आणि विरोधकांवर अत्यंत आक्रमक शब्दांत हल्ला चढवला आहे. “खासदार संजय राऊत यांच्या विधानांवर कोणाचा आक्षेप असेल, तर त्याचे उत्तर राऊतांना द्यावे. ज्यांचा राजकारणाशी आणि पदाशी काडीमात्र संबंध नाही, त्या रश्मी ठाकरे यांचे नाव विनाकारण चर्चेत आणणे हा अत्यंत गलिच्छ प्रकार आहे. यापुढे रश्मी वहिनींचे नाव पुन्हा घेतले, तर ठाकरे गटातील महिला आघाडी ठामपणे रस्त्यावर उभी राहील आणि चोख उत्तर देईल,” असा सज्जड इशारा किशोरी पेडणेकर यांनी पत्रकार परिषदेत दिला. या पत्रकार परिषदेत त्यांनी महाराष्ट्रातील बिघडलेली कायदा-सुव्यवस्था, ठाण्यातील पूर्णेकर हत्याकांडाचा तपास आणि केंद्रीय निवडणूक आयोगाच्या मतदार पडताळणी मोहिमेतील (SIR) कथित घोळावरून सत्ताधाऱ्यांना थेट पिंजऱ्यात उभे केले. संजय राऊतांशी लढा, राजकारणात नसलेल्या महिलेला लक्ष्य का करता? प्रदीप पूर्णेकर हत्याकांडाच्या आरोप-प्रत्यारोपात माजी महापौर मीनाक्षी शिंदे यांनी पत्रकार परिषद घेऊन ठाकरे कुटुंबीयांवर केलेल्या टीकेचा समाचार घेताना पेडणेकर म्हणाल्या, “संजय राऊत यांनी मीनाक्षी शिंदे यांच्याबाबत केलेल्या वक्तव्यांवर राग असेल, तर त्यांनी थेट राऊतांशी दोन हात करावेत. रश्मी ठाकरे यांच्याकडे कोणतेही घटनात्मक किंवा राजकीय पद नाही. त्या केवळ उद्धव ठाकरे यांच्या पत्नी आणि आदित्य ठाकरे यांच्या आई आहेत. निव्वळ कौटुंबिक नातेसंबंधांचा आधार घेऊन राजकारणाशी थेट संबंध नसलेल्या एका सन्माननीय महिलेवर चिखलफेक करणे अत्यंत निंदनीय आहे.” महिला आघाडी आक्रमक होणार “आम्ही महिला म्हणून राजकारणात अनेक जोखीमा पत्करून काम करतो, पण याचा अर्थ कुणाचा जीव घेऊन किंवा खालच्या पातळीवर जाऊन काम करणे असा होत नाही. राजकीय वादाला राजकीय पातळीवरच उत्तर द्यावे. रश्मी ठाकरेंचे नाव पुन्हा उच्चारले गेले, तर ठाकरे पक्षाच्या महिला शांत बसणार नाहीत.” महाराष्ट्रात ‘कोयता’ अन् ‘शूटर गँग’चे राज्य राज्यातील कायदा आणि सुव्यवस्थेवर बोट ठेवत त्यांनी गृहमंत्रालयाच्या कारभारावर प्रश्नचिन्ह उपस्थित केले. “मुंबई, ठाणे, पुणे आणि नाशिकसारख्या महत्त्वाच्या शहरांमध्ये आज गुन्हेगारी टोळ्यांचे साम्राज्य पसरले आहे. कुठे ‘कोयता गँग’ची दहशत, तर कुठे भरदिवसा गोळ्या झाडणाऱ्या ‘शूटर गँग’चा सुळसुळाट सुरू आहे. यामुळे सर्वसामान्य नागरिकांची आणि विशेषतः महिलांची सुरक्षा वाऱ्यावर सोडली गेली आहे.” तपासातून सत्य बाहेर यावे “प्रदीप पूर्णेकर यांच्या निघृण हत्येचा तपास करण्यासाठी विशेष तपास पथक (SIT) स्थापन झाले असून काही आरोपींना अटक करण्यात आली आहे. महाराष्ट्र आणि मुंबई पोलिसांच्या कार्यक्षमतेवर आमचा पूर्ण विश्वास आहे. मात्र, सध्या तपास यंत्रणांचा वापर ज्या राजकीय दबावाखाली सुरू आहे, त्यामुळे जनतेच्या मनात संशय निर्माण होत आहे. पूर्णेकर हत्याकांडात ज्यांची नावे संशयित म्हणून समोर आली आहेत, त्यांची निष्पक्ष चौकशी करून यातील खरा सूत्रधार गजाआड केला पाहिजे.” चौकशी म्हणजे गुन्हेगार नव्हे “एखाद्या व्यक्तीला चौकशीसाठी बोलावणे म्हणजे ती व्यक्ती गुन्हेगार ठरत नाही. आदित्य ठाकरे यांच्यावर विरोधक कितीही निराधार आरोप करत असले, तरी लोकशाही मूल्यांवर विश्वास ठेवून ते सर्व चौकशीला निधड्या छातीने सामोरे जात आहेत. क्लीन चिट मिळालेल्या जुन्या प्रकरणांना राजकीय फायद्यासाठी पुन्हा उकरून काढणे थांबवले पाहिजे.” मतदार यादीतील SIR मोहीम हा दरोडा पत्रकार परिषदेच्या उत्तरार्धात किशोरी पेडणेकर यांनी केंद्रीय निवडणूक आयोगाच्या ‘विशेष सखोल पुनरीक्षण’ (SIR) प्रक्रियेवर गंभीर आक्षेप नोंदवले. “एसआयआरच्या नावाखाली लाखो वैध मतदारांची नावे संशयास्पदरीत्या मतदार यादीतून वगळली जात आहेत. मतदानाचा अधिकार हा राज्यघटनेने प्रत्येक नागरिकाला दिलेला मूलभूत अधिकार आहे. त्यामुळे या याद्यांमध्ये होणारे बदल पूर्णपणे पारदर्शक असले पाहिजेत आणि नागरिकांच्या शंकांचे निरसन करण्याची प्राथमिक जबाबदारी निवडणूक यंत्रणेची आहे.” महामोर्चा कोणत्याही एका पक्षाचा नाही “निवडणूक आयोगाच्या मनमानी कारभाराविरोधात निघणारा मोर्चा हा केवळ एका पक्षापुरता मर्यादित नाही. हा देशातील लोकशाही आणि नागरिकांचा मतदानाचा अधिकार वाचवण्याचा लढा आहे. म्हणूनच या आंदोलनात शिवसेना (उद्धव बाळासाहेब ठाकरे), राज ठाकरे यांची महाराष्ट्र नवनिर्माण सेना (मनसे), काँग्रेस आणि राष्ट्रवादी काँग्रेससह सर्व समविचारी राजकीय शक्ती व सुज्ञ नागरिक एकत्र येत आहेत.” मतदारांनी जागरूक राहावे “आजच्या तरुणांनी आपल्या पुढील पिढीचे लोकशाही हक्क अबाधित ठेवण्यासाठी पुढे आले पाहिजे. सध्या राज्यात दावे-हरकती नोंदवण्यासाठी विशेष शिबिरे सुरू आहेत, त्यामुळे सर्व नागरिकांनी आपले नाव यादीत कायम आहे की नाही याची वेळीच खात्री करावी,” असे आवाहनही त्यांनी केले. ठाण्यातील पूर्णेकर हत्याकांडातून पेटलेला राजकीय वणवा आणि मतदार यादीतील घोळावरून उफाळलेला असंतोष या दोन्ही मुद्द्यांवरून ठाकरे गटाच्या महिला आघाडीने घेतलेल्या या आक्रमक भूमिकेमुळे राज्यातील सत्ताधारी आणि विरोधकांमधील राजकीय संघर्ष आता अधिक तीव्र व टोकदार होण्याची चिन्हे दिसत आहेत.



Source link