जळगाव जिल्ह्यात रावेर आणि यावल तालुक्यातील काही गावांत रविवारी दुपारी तीन वाजेच्या सुमारास किरकोळ वादळी वाऱ्यासह हलक्या ते मध्यम स्वरूपाच्या पावसाने हजेरी लावली आहे. या पावसानंतर वातावरणात बदल झाला.
दिवसाच्या कमाल तापमानातही घट झाली आहे. यामुळे गेल्या काही दिवसांपासून असह्य उन्हाच्या झळा सोसणाऱ्या जिल्ह्यातील नागरिकांना काहीअंंशी दिलासा मिळाला आहे. दरम्यान, धुळे, नंदुरबार जिल्ह्यात रविवारी पाऊस झालेला नाही. मात्र बहुतांश भागात दुपारनंतर ढगाळ वातावरण हाेते. अरबी समुद्रातील आर्द्रता आणि बदलत्या वाऱ्यांमुळे गेल्या काही दिवसांपासून उत्तर महाराष्ट्रात आकाश ढगाळ बनले आहे. ढगांमुळे उन्हाची थेट तीव्रता कमी झाली असली, तरी हवेतील दमटपणा वाढला आहे. यावल तालुक्यातील फैजपूर, आमाेदा, दहिगावात तसेच रावेर शहरासह तालुक्यातील काही गावांत रविवारी दुपारच्या सुमारास पंधरा मिनिटे पाऊस झाला. केळी पिकावर वाढत्या उष्णतेचा परिणाम होत असताना या बदललेल्या हवामानामुळे काही प्रमाणात दिलासा मिळू शकतो, अशी अपेक्षा व्यक्त होत आहे.
Source link
रावेर, यावल तालुक्यांत वादळासह पाऊस:जळगाव जिल्ह्यात दुपारनंतर ढगाळ वातावरणाने काहीसा दिलासा
