सत्तेत बसूनही रस्त्यावर आंदोलनाची नौटंकी कशासाठी?:पराभवाच्या भीतीनेच ज्ञानेश कुमारांचा राजीनामा टाळतायत; शशिकांत शिंदेंची सत्ताधाऱ्यांवर टीका

“मुख्य निवडणूक आयुक्त ज्ञानेश कुमार यांचा राजीनामा घेतला तरी पुन्हा सत्तेत येणे शक्य नाही, हे वास्तव महायुती सरकारला चांगले ठाऊक आहे; म्हणूनच ते त्यांचा राजीनामा घेण्याचे धाडस दाखवत नाहीत. मुळात सत्तेत बसलेले लोकच स्वतः रस्त्यावर उतरून मोर्चे आणि आंदोलने करत आहेत, यापेक्षा मोठा राजकीय विनोद कोणता असू शकतो? सत्ताधारी पक्षांनी रस्त्यावर उतरून आंदोलन करणे हे पूर्णपणे हास्यास्पद असून, राज ठाकरे यांनी घेतलेली भूमिका अत्यंत योग्य आहे,” अशा शब्दांत राष्ट्रवादी काँग्रेस शरदचंद्र पवार पक्षाचे नवनिर्वाचित प्रदेशाध्यक्ष शशिकांत शिंदे यांनी सत्ताधारी भाजप आणि महायुतीवर जोरदार निशाणा साधला. पुण्यात माध्यमांशी संवाद साधताना शशिकांत शिंदे यांनी विरोधी पक्षांच्या देशव्यापी आंदोलनाची भूमिका स्पष्ट केली, तसेच सत्ताधाऱ्यांकडून सुरू असलेल्या आंदोलनांच्या विरोधातील प्रचाराचा समाचार घेतला. ज्ञानेश कुमारांचा राजीनामा घेतला तरी सरकार परत येणार नाही -शशिकांत शिंदे निवडणूक आयोगाच्या भूमिकेवर आणि विरोधी पक्षांच्या मागण्यांवर भाष्य करताना शशिकांत शिंदे म्हणाले, “विरोधी पक्षांनी निवडणूक प्रक्रियेतील त्रुटी आणि मतदार यादीतील घोळाविरोधात अत्यंत तीव्र आणि ताकदीने आंदोलन उभे केले आहे. मात्र हे आंदोलन संपल्यानंतर ज्या पद्धतीने सत्ताधाऱ्यांकडून त्याचे विकृतीकरण करून चित्र रंगवले जात आहे, ते पूर्णपणे चुकीचे आहे.” राजीनाम्याची मागणी का टाळली जाते? “सरकारला स्वतःची पत आणि वस्तुस्थिती स्पष्टपणे कळून चुकली आहे. ज्ञानेश कुमार यांचा राजीनामा घेतला तरी जनतेचा रोष थांबणार नाही आणि महायुती पुन्हा सत्तेवर येऊ शकणार नाही, याची पक्की जाणीव असल्यामुळेच सरकार या मुद्द्यावर मौन बाळगून आहे.” सत्तेत असूनही रस्त्यावर तांडव कशासाठी? भाजपच्या ‘लोकशाही बचाओ, अराजकता हटाओ’ मोर्चाची खिल्ली उडवताना त्यांनी मनसे प्रमुख राज ठाकरे यांच्या विधानाचा संदर्भ दिला. “राज्यात आणि देशात तुम्ही सत्तेत बसलेले आहात की नाही? जर तुमच्या हातात संपूर्ण सत्ता आणि प्रशासकीय यंत्रणा आहे, तर तुम्ही स्वतःच रस्त्यावर उतरून कसले आंदोलनाचे नाटक करत आहात?” आंदोलने करणे विरोधकांचे काम “राज ठाकरे यांनी नेमके हेच सांगितले होते आणि त्यांचे म्हणणे 100% खरे आहे. जनतेच्या प्रश्नांवर आणि सरकारच्या चुकांवर रस्त्यावर उतरून जाब विचारणे हे विरोधी पक्षांचे कर्तव्य असते. पण इथे सत्तेत बसलेले लोकच आंदोलन करत आहेत, ही निव्वळ नौटंकी आहे.” आगामी काळात आंदोलनाची धग आणखी वाढणार! विरोधकांच्या एकजुटीवर आणि आंदोलनाच्या भविष्याबद्दल बोलताना प्रदेशाध्यक्ष शिंदे म्हणाले, “विरोधकांनी घेतलेली आक्रमक भूमिका ही जनतेच्या हक्कासाठी आहे. सत्ताधाऱ्यांनी कितीही दिशाभूल करण्याचा प्रयत्न केला, तरी आगामी काळात या जनआंदोलनाची तीव्रता आणखी कित्येक पटीने वाढणार आहे.” लोकशाही संस्थांची स्वायत्तता धोक्यात आणणाऱ्या सत्ताधाऱ्यांना आगामी काळात जनता मतपेटीतून चोख उत्तर देईल, असा विश्वासही त्यांनी यावेळी व्यक्त केला. ———————————————————– हेही वाचा… कोल्हापुरात स्वाभिमानीचा एल्गार: 21 तासांपासून पुणे-बंगळुरू महामार्ग रोखला, राजू शेट्टींचा इशारा, म्हणाले- तोडगा निघाला नाही तर दूध-भाजीपालाही मुंबईला जाऊ देणार नाही उसाला योग्य दर मिळावा या मागणीसाठी स्वाभिमानी शेतकरी संघटनेने पुकारलेले आंदोलन आता अधिकच तीव्र झाले आहे. आंदोलनाच्या दुसऱ्या दिवशीही कोल्हापुरात स्वाभिमानी शेतकरी संघटनेने पुणे-बंगळुरू महामार्ग रोखून धरला असून, किणी टोलनाक्यावर नेते राजू शेट्टी यांनी गेल्या २१ तासांपासून ठिय्या मांडला आहे. जोपर्यंत ऊसदराबाबत तोडगा निघत नाही, तोपर्यंत आंदोलन मागे घेणार नाही, अशी ठाम भूमिका राजू शेट्टी यांनी घेतली असून, आता मुंबईकडे जाणारा भाजीपाला आणि दूधही रोखण्याचा मोठा इशारा त्यांनी दिला आहे. सविस्तर वाचा



Source link