महाराष्ट्र नवनिर्माण सेनेचे अध्यक्ष राज ठाकरे यांचे सुपुत्र आणि मनसे नेते अमित ठाकरे यांचा आज वाढदिवस आहे. या निमित्ताने दादर येथील ‘शिवतीर्थ’ निवासस्थानी कार्यकर्त्यांची मोठी मांदियाळी पाहायला मिळाली. याच पार्श्वभूमीवर युवासेना प्रमुख, आमदार आदित्य ठाकरे यांनी थेट ‘शिवतीर्थ’ गाठत अमित ठाकरे यांना वाढदिवसाच्या शुभेच्छा दिल्या. अमित ठाकरे यांनी आदित्य ठाकरेंच्या उपस्थित केक कापला. अमित ठाकरे यांना शुभेच्छा देण्यासाठी सकाळपासूनच राज्यभरातून मनसेचे पदाधिकारी आणि कार्यकर्ते शिवतीर्थावर दाखल झाले होते. याच दरम्यान, सकाळी आदित्य ठाकरे यांचे आगमन झाले. आदित्य ठाकरे यांनी अमित ठाकरेंची भेट घेऊन त्यांना अत्यंत आपुलकीने गळाभेट दिली आणि पुष्पगुच्छ देऊन शुभेच्छा दिल्या. मुंबई महानगरपालिका निवडणुकीच्या रणधुमाळीनंतर दोन्ही ज्युनिअर ठाकरे बंधूंची ही पहिलीच भेट आहे. इंग्रजीला फाटा, मराठीतून गाणे गात शुभेच्छा अमित ठाकरे यांचा वाढदिवस साजरा करताना मनसेच्या कार्यकर्त्यांनी मराठी भाषेचा स्वाभिमान जपल्याचे पाहायला मिळाले. केक कापताना एरवी गायले जाणारे इंग्रजी गाणे टाळून, पूर्णपणे मराठीत गाणे गात अमित ठाकरे यांना शुभेच्छा देण्यात आल्या. ठाकरे कुटुंबातील हा घरगुती आणि जिव्हाळ्याचा सोहळा पाहून उपस्थित कार्यकर्त्यांमध्येही उत्साहाचे वातावरण होते. केकमधून ‘नीट’ परीक्षेवर भाष्य वाढदिवसाच्या या सोहळ्यात महाराष्ट्र नवनिर्माण विद्यार्थी सेनेच्या वतीने आणलेल्या एका खास केकने सर्वांचे लक्ष वेधून घेतले. वाढदिवसाच्या सेलिब्रेशनमधूनही विद्यार्थ्यांच्या ज्वलंत प्रश्नाला हात घालण्यात आला. सध्या देशभरात गाजत असलेल्या ‘नीट’ (NEET) पेपरफुटी प्रकरणाच्या पार्श्वभूमीवर, या केकवर “नीट हटवा, देश वाचवा” असा संदेश लिहिण्यात आला होता.
Source link
अमित ठाकरेंच्या वाढदिवसाला आदित्य ठाकरेंची हजेरी:गळाभेट घेत दिल्या शुभेच्छा, विद्यार्थी सेनेच्या केकने वेधले लक्ष
