अमूल-मदर डेअरीनंतर आता गोकुळचे दूधही महागणार?:प्रतिलिटर 2 की 4 रुपयांची दरवाढ होणार, नवे अध्यक्ष राजेश पाटील यांनी दिले महत्त्वाचे संकेत

सर्वसामान्य ग्राहकांच्या खिशाला पुन्हा एकदा महागाईची झळ बसण्याची शक्यता आहे. अमूल आणि मदर डेअरीनंतर आता गोकुळ दूध संघाकडूनही दुधाच्या दरात वाढ करण्याच्या हालचाली सुरू झाल्या आहेत. गोकुळच्या दुधाचे दर प्रतिलिटर 2 रुपयांनी वाढवायचे की 4 रुपयांनी, याबाबत अद्याप अंतिम निर्णय झालेला नाही. मात्र, येत्या बुधवार किंवा गुरुवारपर्यंत दूध दरवाढीबाबत घोषणा केली जाण्याची शक्यता आहे. गोकुळचे नवनिर्वाचित अध्यक्ष राजेश पाटील यांनी याबाबत महत्त्वाचे संकेत दिले आहेत. गोकुळच्या पहिल्याच बैठकीत दूध दरवाढीवर चर्चा कोल्हापूर जिल्हा सहकारी दूध उत्पादक संघ अर्थात गोकुळच्या अध्यक्षपदाची निवड झाल्यानंतर राजेश पाटील यांच्या अध्यक्षतेखाली संचालक मंडळाची पहिली बैठक पार पडली. या बैठकीला सर्व 25 संचालकांसह शासननियुक्त 4 संचालक उपस्थित होते. बैठकीत संस्थेच्या आर्थिक परिस्थितीपासून ते आगामी काळातील धोरणात्मक निर्णयांपर्यंत विविध विषयांवर चर्चा करण्यात आली. बैठकीनंतर माध्यमांशी बोलताना राजेश पाटील यांनी गोकुळच्या आर्थिक परिस्थितीचा आढावा मांडला. गेल्या सहा महिन्यांत दूध संघाला सुमारे 24 कोटी रुपयांचा तोटा झाल्याची माहिती त्यांनी दिली. त्यामुळे आगामी 130 दिवसांत हा तोटा भरून काढण्याचे आणि संस्थेला पुन्हा आर्थिक नफ्यात आणण्याचे मोठे आव्हान संचालक मंडळासमोर असणार आहे. यासाठी सर्व संचालकांना विश्वासात घेऊन आवश्यक निर्णय घेतले जाणार असल्याचे त्यांनी स्पष्ट केले. अमूल आणि मदर डेअरीनंतर गोकुळही दरवाढीच्या तयारीत गेल्या काही दिवसांत अमूल आणि मदर डेअरीने दुधाच्या विविध प्रकारांच्या किमतीत वाढ केली आहे. काही प्रकारच्या दुधाच्या दरात प्रतिलिटर 2 ते 6 रुपयांपर्यंत वाढ करण्यात आली आहे. या पार्श्वभूमीवर गोकुळकडूनही दरवाढ केली जाणार का, याकडे ग्राहक आणि दूध उत्पादक शेतकऱ्यांचे लक्ष लागले आहे. याबाबत बोलताना राजेश पाटील यांनी सांगितले की, मुंबईतील दुधाच्या दरवाढीच्या पार्श्वभूमीवर गोकुळच्या 13 संचालकांनी त्यांच्याकडे निवेदन दिले आहे. शासननियुक्त संचालकांनीही या विषयावर सकारात्मक भूमिका घेतली आहे. मुंबईतील वितरक आणि मार्केटिंग अधिकाऱ्यांशी चर्चा करून पुढील दोन दिवसांत दरवाढीबाबत निर्णय घेतला जाणार आहे. गोकुळचा ब्रँड मुंबई आणि पुणे या दोन्ही बाजारपेठांमध्ये मजबूत असल्याचा विश्वासही त्यांनी व्यक्त केला. ग्राहकांचा गोकुळच्या दुधाच्या गुणवत्तेवर विश्वास असल्याने दरवाढ झाली तरी विक्रीवर फारसा परिणाम होणार नाही, असे त्यांचे म्हणणे आहे. प्रतिलिटर 2 की 4 रुपये? बुधवारी किंवा गुरुवारी घोषणा शक्य गोकुळच्या दूध दरवाढीबाबत सध्या सर्वाधिक चर्चा सुरू आहे ती म्हणजे प्रतिलिटर किती रुपयांनी दर वाढणार? ग्राहकांच्या मनातही याबाबत उत्सुकता आहे. प्रतिलिटर 2 रुपये वाढवायचे की 4 रुपये, यावर अद्याप संचालक मंडळात सविस्तर चर्चा झालेली नाही. राजेश पाटील यांच्या माहितीनुसार, येत्या बुधवार किंवा गुरुवारपर्यंत सर्व संचालकांशी चर्चा करून दरवाढीचा निर्णय जाहीर केला जाऊ शकतो. हा निर्णय घेताना ग्राहकांचे हित आणि दूध उत्पादक शेतकऱ्यांचे आर्थिक हित या दोन्ही गोष्टींचा विचार केला जाणार आहे. सर्व 29 संचालक एकत्रितपणे याबाबत निर्णय घेतील, असेही त्यांनी स्पष्ट केले. त्यामुळे गोकुळच्या दुधाचे दर नेमके किती वाढणार आणि ही दरवाढ कधीपासून लागू होणार, याचे चित्र पुढील काही दिवसांत स्पष्ट होण्याची शक्यता आहे. सहा महिन्यांत 24 कोटींचा तोटा; कारणांचा शोध घेणार दूध दरवाढीच्या चर्चेबरोबरच गोकुळच्या आर्थिक नुकसानीचा मुद्दाही या बैठकीत महत्त्वाचा ठरला. प्रशासकीय कार्यकाळात संस्थेला सुमारे 24 कोटी रुपयांचा तोटा झाल्याचे अध्यक्ष राजेश पाटील यांनी सांगितले. या नुकसानीमागील नेमकी कारणे शोधण्यासाठी अधिकारी आणि संचालकांची स्वतंत्र बैठक घेतली जाणार आहे. पशुखाद्याच्या खर्चात झालेली वाढ किंवा इतर प्रशासकीय आणि आर्थिक कारणांमुळे तोटा वाढला आहे का, याची तपासणी केली जाणार आहे. याशिवाय यापूर्वी घेतलेल्या धोरणात्मक निर्णयांचा संस्थेच्या आर्थिक स्थितीवर काय परिणाम झाला, याचाही आढावा घेतला जाणार आहे. नेमक्या त्रुटी शोधून भविष्यात अशा प्रकारचे आर्थिक नुकसान होऊ नये, यासाठी आवश्यक उपाययोजना करण्याचा संचालक मंडळाचा प्रयत्न असणार आहे. ग्राहकांना महागाईचा फटका, दूध उत्पादकांना मिळणार दिलासा? गोकुळकडून दूध दरवाढीचा निर्णय घेतला गेल्यास त्याचा थेट परिणाम ग्राहकांच्या मासिक खर्चावर होऊ शकतो. आधीच जीवनावश्यक वस्तूंच्या वाढत्या किमतींमुळे सर्वसामान्य नागरिकांचे बजेट कोलमडत असताना दुधाच्या किमतीत होणारी वाढ त्यांच्या खर्चात आणखी भर घालू शकते. दुसरीकडे दूध उत्पादक शेतकऱ्यांना योग्य दर मिळणेही तितकेच महत्त्वाचे आहे. दूध उत्पादनासाठी लागणारा चारा, पशुखाद्य, औषधे आणि इतर खर्च सातत्याने वाढत असल्याने उत्पादक शेतकऱ्यांना आर्थिकदृष्ट्या सक्षम ठेवण्याचे आव्हान दूध संघासमोर आहे. त्यामुळे गोकुळचे नवे संचालक मंडळ दरवाढीचा निर्णय घेताना ग्राहक आणि दूध उत्पादक या दोन्ही घटकांचा समतोल कसा साधणार, हे पाहणे महत्त्वाचे ठरणार आहे. सध्या दरवाढीचे संकेत मिळाले असले तरी प्रतिलिटर 2 की 4 रुपये वाढणार आणि नवीन दर कधीपासून लागू होणार, याबाबत अधिकृत घोषणा झाल्यानंतरच अंतिम चित्र स्पष्ट होईल. हेही वाचा दुष्काळाच्या संकटात शेतकऱ्यांना दिलासा द्या:धनंजय महाडिक दिल्लीत अमित शाहांच्या भेटीला, 5 प्रमुख मागण्या मांडल्या महाराष्ट्रात यंदा अपुऱ्या आणि अनियमित पावसामुळे शेतीचे गणित बिघडले असून, शेतकरी आर्थिक संकटात सापडले आहेत. पावसाअभावी पिकांची वाढ खुंटली, जमिनीतील ओलावा कमी झाला आणि अनेक भागांत पाणीटंचाई निर्माण झाली आहे. याचा परिणाम केवळ खरीप पिकांपुरता मर्यादित न राहता रब्बी हंगाम, ऊस उत्पादन आणि पशुपालनावरही होत आहे. विशेषतः सोलापूर जिल्ह्यात दुष्काळसदृश परिस्थिती निर्माण झाल्याने शेतकरी, साखर कारखानदार आणि पशुपालकांसमोर अनेक अडचणी उभ्या राहिल्या आहेत. सविस्तर वाचा….



Source link