पुण्यातील बांधकाम व्यावसायिक आणि लेबर काँट्रॅक्टर खलील शेख यांच्या आत्महत्या प्रकरणाने आता मोठे राजकीय वळण घेतले आहे. या प्रकरणात गुन्हा दाखल झाल्यानंतर माजी आमदार आणि एकनाथ शिंदेंच्या शिवसेनेचे नेते रवींद्र धंगेकर यांच्या अडचणीत कमालीची वाढ झाली आहे. धंगेकर आणि त्यांच्या पत्नीवर अटकेची टांगती तलवार असल्याने हे दाम्पत्य सध्या ‘नॉट रिचेबल’ झाले आहे. पोलिसांची विशेष पथके त्यांच्या शोधासाठी रवाना झाली असून, दुसरीकडे धंगेकर यांनी अटकेपासून संरक्षण मिळवण्यासाठी कायदेशीर हालचाली सुरू केल्या आहेत. पोलिसांनी या प्रकरणात अटकेची कारवाई करण्याचे संकेत दिल्यानंतर रवींद्र धंगेकर आणि त्यांच्या पत्नी प्रतिभा धंगेकर मोबाईल बंद करून अज्ञातस्थळी गेले आहेत. संभाव्य अटक टाळण्यासाठी धंगेकर दाम्पत्याने न्यायालयात अटकपूर्व जामीन मिळवण्यासाठी अर्ज दाखल केला आहे. या अटकपूर्व जामीन अर्जावर येत्या सोमवारी न्यायालयात महत्त्वपूर्ण सुनावणी होणार आहे. तोपर्यंत पोलिसांच्या हाती लागू नये म्हणून धंगेकर कायदेशीर सल्लागारांच्या संपर्कात राहून अज्ञातवासात गेल्याचे सांगण्यात येत आहे. दोन सुसाईड नोट आणि अडीच कोटींची थकबाकी खलील शेख यांनी गळफास घेऊन आत्महत्या करण्यापूर्वी सविस्तर व्हिडिओ बनवला होता, तसेच दोन पानी सुसाईड नोटही लिहिल्याचे तपासात समोर आले आहे. शेख यांनी ज्या इमारतीमध्ये आत्महत्या केली, तिच्या बाहेर एक चिठ्ठी चिकटवली होती, तर दुसरी चिठ्ठी पोलिसांना त्यांच्या खिशात सापडली. यानंतर मृतदेह शवविच्छेदनासाठी ससून रुग्णालयात पाठवण्यात आला. खलील शेख यांनी चिठ्ठीत आपल्या मृत्यूसाठी जबाबदार असणाऱ्यांची नावे लिहीत, संबंधितांकडे अडीच कोटी रुपयांची थकबाकी असल्याचे नमूद केले आहे. शेख हे २०११ पासून पुण्यात सेंट्रिंगचे काम करत होते. या कामांसाठी त्यांनी बाहेरून चढ्या व्याजाने पैसे उचलले होते. भागीदारीतील मुख्य नेत्यांनी “आम्ही व्याजासह पैसे परत करू” असे आश्वासन दिले होते, मात्र ऐनवेळी पैसे न मिळाल्याने ते प्रचंड मानसिक तणावाखाली होते. “भागीदार फक्त नावाला, मुख्य कारभार धंगेकरांचाच!” पोलिस उपायुक्त मिलिंद मोहिते यांनी दिलेल्या माहितीनुसार, मृत खलील शेख यांच्या पत्नीच्या अधिकृत तक्रारीनंतर आता या गुन्ह्यात आरोपींची संख्या १४ वर पोहोचली असून स्वारगेट पोलिस ठाण्यात गुन्हा नोंदवण्यात आला आहे. ज्या ‘उत्कर्ष असोसिएट्स’ फर्मच्या प्रकल्पावरून हा वाद सुरू होता, त्यामध्ये रवींद्र धंगेकर यांच्या पत्नी प्रतिभा धंगेकर, मनसेचे माजी नगरसेवक बाळा शेडगे यांच्या पत्नी वर्षा शेडगे आणि रघू गौडा यांच्या पत्नी भागीदार आहेत. मात्र, खलील शेख यांच्या पत्नीने पोलिसांना दिलेल्या जबाबात गंभीर आरोप केला आहे. त्यानुसार, “या कंपनीत महिला केवळ नावालाच भागीदार होत्या, कंपनीचा सर्व आर्थिक व्यवहार आणि मुख्य कारभार स्वतः रवींद्र धंगेकर हेच सांभाळत होते.” पोलिसांचा तपास योग्य दिशेने सुरू स्वारगेट पोलिसांनी या प्रकरणाचे गांभीर्य ओळखून तपास चक्र वेगवान केले आहे. खलील शेख नेमके कोणाकडे पैशांसाठी हेलपाटे मारत होते, आर्थिक व्यवहारात कोणाची काय भूमिका होती आणि अडीच कोटींच्या थकबाकीमध्ये कोणाचा किती वाटा आहे, याचे तांत्रिक विश्लेषण केले जात आहे. न्यायालयाच्या सुनावणीपूर्वी धंगेकरांचा शोध घेण्याचे मोठे आव्हान सध्या पुणे पोलिसांसमोर आहे.
Source link
खलील शेख आत्महत्या प्रकरण:रवींद्र धंगेकर दाम्पत्य 'नॉट रिचेबल'; अटकपूर्व जामिनासाठी कोर्टात धाव, पोलिसांची पथके रवाना
