शिवसेना (उद्धव बाळासाहेब ठाकरे) पक्षात पुन्हा एकदा मोठी फूट पडण्याची शक्यता निर्माण झाली आहे. ठाकरे गटाच्या 9 पैकी 6 ते 7 खासदार उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार असल्याच्या चर्चा गेल्या काही दिवसांपासून राजकीय वर्तुळात रंगल्या आहेत. त्यातच ठाकरे गटाचे दक्षिण मुंबईचे खासदार अरविंद सावंत यांनी लोकसभा अध्यक्ष ओम बिर्ला यांना लिहिलेल्या एका पत्रामुळे या चर्चांना आणखी बळ मिळाले आहे. दरम्यान, या संपूर्ण घडामोडींवर शिवसेना (शिंदे गट) आमदार नरेंद्र भोंडेकर यांनी एक खळबळजनक दावा केला असून, यामुळे राजकीय वर्तुळात तीव्र खळबळ उडाली आहे. उद्धव ठाकरे यांच्यासोबत लोकसभेत केवळ एकच खासदार मागे उरेल, बाकी सर्व खासदार शिंदे गटात सामील होतील,असा दावा आमदार नरेंद्र भोंडेकर यांनी माध्यमांशी बोलताना केला आहे. तर ठाकरे गटाचे 9 पैकी 8 लोकसभा खासदार लवकरच एकनाथ शिंदे यांच्या शिवसेनेत सहभागी होतील. आजच सर्व 8 खासदार येतील असे नाही, पण लवकरच हा प्रवेश निश्चित होईल असे त्यांनी म्हटले आहे. लोकप्रतिनिधींच्या अडचणी समजून घेत नाही नरेंद्र भोंडेकर म्हणाले की, आमदार आणि खासदारांच्या अडचणी काय आहेत, हे ठाकरे गटात कोणीही समजून घेत नाही. जर नेत्यांनी लोकप्रतिनिधींच्या भावना समजून घेतल्या असत्या, तर आज ही वेळ आली नसती. खासदार पैशांच्या आमिषाने किंवा इतर कारणांमुळे जात असल्याचा आरोप करणे सोपे आहे, पण ठाकरे गटाच्या नेतृत्वाने वस्तुस्थिती स्वीकारली पाहिजे. उद्धव ठाकरे नाही कोअर टीम दोषी नरेंद्र भोंडेकर म्हणाले की, या फुटीसाठी केवळ उद्धव ठाकरे दोषी नसून त्यांची ‘कोअर टीम’ जास्त दोषी आहे. खासदारांपाठोपाठ ठाकरे गटाचे अनेक आमदारही लवकरच आमच्या पक्षात येतील. असे त्यांनी एबीपी माझाशी बोलताना म्हटले आहे. शिवसेना (उद्धव बाळासाहेब ठाकरे) पक्षात पुन्हा एकदा मोठी फूट पडण्याची शक्यता निर्माण झाली आहे.
Source link
ठाकरे गटात फक्त 1 खासदार उरणार:खासदार फुटीच्या चर्चेवर आमदार नरेंद्र भोंडेकरांचा दावा, म्हणाले- उद्धव ठाकरे नव्हे, 'कोअर टीम' जबाबदार!
