‘टिंबकटू कलेक्टिव्ह’, ‘कॉज टू कनेक्ट’ला किर्लोस्कर वसुंधरा सन्मान:19 व्या आंतरराष्ट्रीय चित्रपट महोत्सवाचा समारोप, पुणे येथे पुरस्कार प्रदान

पर्यावरण संवर्धनासाठी केलेल्या उल्लेखनीय कार्याबद्दल ‘द टिंबकटू कलेक्टिव्ह’ संस्थेला ‘किर्लोस्कर वसुंधरा सन्मान’ प्रदान करण्यात आला. तसेच, स्थानिक पातळीवर पर्यावरण रक्षणासाठी कार्यरत असलेल्या ‘कॉज टू कनेक्ट’ संस्थेला ‘किर्लोस्कर वसुंधरा मित्र’ पुरस्काराने गौरवण्यात आले. हे पुरस्कार पाषाण येथील पुणे इंटरनॅशनल सेंटरमध्ये आयोजित १९ व्या किर्लोस्कर वसुंधरा आंतरराष्ट्रीय चित्रपट महोत्सवाच्या समारोपप्रसंगी प्रदान करण्यात आले. या महोत्सवाला पर्यावरणतज्ज्ञ, वन्यजीव संरक्षक, विद्यार्थी, चित्रपट निर्माते आणि निसर्गप्रेमींचा उत्स्फूर्त प्रतिसाद मिळाला. पर्यावरण संवर्धन, हवामान बदल आणि मानवी जीवनावर होणारे पर्यावरणीय परिणाम यांसारख्या महत्त्वाच्या विषयांवर विविध उपक्रमांद्वारे विचारमंथन करण्यात आले. ‘द टिंबकटू कलेक्टिव्ह’ संस्थेने दुष्काळग्रस्त अनंतपूर परिसरातील हजारो गरजू कुटुंबांना सामुदायिक सहकारी संस्था, पर्यायी बँकिंग व्यवस्था आणि सेंद्रिय शेतीच्या माध्यमातून मदत केली आहे. दुसरीकडे, ‘कॉज टू कनेक्ट’ संस्थेचा ‘हुन्नर गुरुकुल’ हा प्रमुख उपक्रम आहे. या उपक्रमाद्वारे तरुणांना सुतारकाम, गवंडीकाम आणि बांबू हस्तकलेचे व्यावसायिक प्रशिक्षण दिले जाते. यातून कौशल्य विकास साधून तरुणांना स्वावलंबी आणि जबाबदार नागरिक बनवण्याचे कार्य केले जाते. महोत्सवाची सुरुवात सी. बी. तुपे साधना कन्या विद्यालय, लोयोला हायस्कूल आणि सेंट जोसेफ हायस्कूलच्या विद्यार्थ्यांसाठी विशेष सत्राने झाली. या सत्रात पर्यावरणविषयक लघुपट, खेळ आणि विविध उपक्रमांद्वारे विद्यार्थ्यांमध्ये पर्यावरण जागृती करण्यात आली. ‘द यूथ कॉस्मो’च्या सहसंस्थापिका निधी बेन्नूर यांच्या मार्गदर्शनाखाली हा कार्यक्रम पार पडला. कार्यक्रमाची सुरुवात मेळघाटातील कोरकू आदिवासी समुदायाच्या लोकनृत्याने झाली. यावेळी ‘डाउन द ड्रेन’, ‘दिस मॉर्टल प्लास्टिक’, ‘वूड यू स्टील लव्ह मी इफ आय वॉज अ स्टिकी फ्रॉग?’ यांसारखे लघुपट आणि ‘ह्यूमन्स इन द लूप’ हा चित्रपट प्रदर्शित करण्यात आला. विद्यार्थ्यांनी ‘प्लास्टिक : फ्रॉम वंडर टू मॉन्स्टर’ हे लघुनाट्य सादर केले. तसेच, आभासी कचरा फेरी आणि आभासी जंगल फेरीच्या माध्यमातून पर्यावरणाबाबत आत्मपरीक्षणाची संधी उपलब्ध करून देण्यात आली. एसएल किर्लोस्कर सीएसआर फाउंडेशनच्या संचालक आरती किर्लोस्कर यांनी पुरस्कार विजेत्यांचे कार्य पर्यावरणीय आव्हानांवर मात करण्यासाठी प्रेरणादायी असल्याचे नमूद केले. या महोत्सवापूर्वी ऑगस्टच्या दुसऱ्या आठवड्यात आयोजित ‘चिल्ड्रन्स आर्ट फेस्ट’मध्ये ७५० हून अधिक मुलांनी सहभाग घेतला होता.



Source link