गोकुळच्या वादात अभिजीत दीपकेंची उडी:फडणवीसांना थेट 'अराजकतावादी' म्हणत निशाणा

कोल्हापूर जिल्हा सहकारी दूध उत्पादक संघ अर्थात गोकुळमधील सत्तासंघर्ष आता अधिक तीव्र झाला आहे. गोकुळच्या निवडणुकीत सतेज पाटील यांच्या नेतृत्वाखालील गटाने बाजी मारल्यानंतर राज्य सरकारने दूध संघावर चार स्वीकृत सदस्यांची नियुक्ती केली. या नियुक्तींना मतदानाचा अधिकार देण्यात आल्याने राजकीय वाद निर्माण झाला आहे. सरकारच्या या निर्णयाविरोधात कोल्हापुरातील हजारो दूध उत्पादक शेतकरी रस्त्यावर उतरले. दरम्यान, या वादात आता सीजेपीचे अध्यक्ष अभिजीत दीपके यांनीही उडी घेत मुख्यमंत्री देवेंद्र फडणवीस यांच्यावर थेट निशाणा साधला आहे. फडणवीस यांना ‘अराजकतावादी’ संबोधत त्यांनी सरकारच्या भूमिकेवर गंभीर प्रश्न उपस्थित केले आहेत. गोकुळ दूध संघावर सरकारने चार स्वीकृत सदस्यांची नियुक्ती केल्याच्या निषेधार्थ आज कोल्हापुरात भव्य मोर्चाचे आयोजन करण्यात आले होते. आमदार सतेज पाटील यांच्या नेतृत्वाखाली निघालेल्या या मोर्चात हजारो दूध उत्पादक शेतकरी सहभागी झाले. विशेष म्हणजे, शेतकरी गायी आणि म्हशींसह या आंदोलनात सहभागी झाल्याने दसरा चौक परिसरात मोठी गर्दी झाली होती. दसरा चौक ते जिल्हाधिकारी कार्यालय असा हा मोर्चा काढण्यात आला. यामध्ये शेतकरी नेते राजू शेट्टी, राष्ट्रवादी काँग्रेसचे जयंत पाटील, खासदार शाहू महाराज यांच्यासह विविध राजकीय पक्षांचे नेते आणि कार्यकर्ते सहभागी झाले होते. या मोर्चाचा व्हिडीओ अभिजीत दीपके यांनी सोशल मीडिया प्लॅटफॉर्म एक्सवर शेअर केला आहे. त्यासोबतच त्यांनी मुख्यमंत्री देवेंद्र फडणवीस यांच्या नेतृत्वाखालील भाजप सरकारवर जोरदार टीका केली. दूध संघाच्या निवडणुकीत पराभव स्वीकारल्यानंतरही जनतेने दिलेला कौल मान्य करण्याऐवजी सत्तेच्या जोरावर संस्था ताब्यात घेण्याचा प्रयत्न केला जात असल्याचा आरोप त्यांनी केला. एका सहकारी दूध संघाच्या निवडणुकीतील जनमताचा अनादर करून अतिरिक्त सदस्यांच्या माध्यमातून सत्तेची समीकरणे बदलण्याचा प्रयत्न म्हणजे लोकशाही मूल्यांना हरताळ फासण्याचा प्रकार असल्याचे दीपके यांनी म्हटले आहे. काय म्हणाले अभिजीत दीपके? अभिजीत दीपके यांनी आपल्या पोस्टमध्ये मुख्यमंत्री देवेंद्र फडणवीस यांच्यावर थेट टीका केली आहे. निवडणुकीत पराभव झाल्यानंतर जनतेचा कौल स्वीकारण्याऐवजी सत्तेचा वापर करून दूध संघ ताब्यात घेण्याचा प्रयत्न केला जात असल्याचे त्यांनी म्हटले. जनमताचा कौल डावलून सत्ता हस्तगत करण्याचा प्रयत्न करणारेच खरे अराजकतावादी आहेत, अशा शब्दांत त्यांनी सरकारवर हल्लाबोल केला. तसेच, गोकुळ दूध संघाला असंवैधानिक आणि अराजकतावादी शक्तींपासून वाचवण्यासाठी रस्त्यावर उतरलेल्या कोल्हापूरकरांना त्यांनी सलाम केला. या पोस्टमधून त्यांनी केवळ गोकुळमधील सत्तासंघर्षावर भाष्य केले नाही, तर या प्रकरणाच्या माध्यमातून राज्यातील निवडणूक प्रक्रियेवरही प्रश्न उपस्थित केले आहेत. एका सहकारी संस्थेचा जनादेश बदलण्यासाठी सरकार इतके प्रयत्न करत असेल, तर राज्यातील निवडणुकांमध्ये काय घडत असेल, असा सवालही त्यांनी उपस्थित केला. या संदर्भात त्यांनी मुख्य निवडणूक आयुक्त ज्ञानेश कुमार यांचा उल्लेख केला आहे. गोकुळमध्ये नेमका वाद काय? गोकुळ दूध संघाच्या निवडणुकीत सतेज पाटील यांच्या गटाने 13 जागा जिंकत स्पष्ट आघाडी मिळवली होती. दुसरीकडे भाजपप्रणित महायुतीला 12 जागांवर समाधान मानावे लागले. त्यामुळे निवडणुकीच्या निकालानुसार सतेज पाटील गटाचे पारडे जड झाले होते. मात्र, निवडणुकीनंतर राज्य सरकारने अध्यादेश काढून दूध संघावर मतदानाचा अधिकार असलेले चार अतिरिक्त स्वीकृत सदस्य नियुक्त करण्याची तरतूद केली. या निर्णयामुळे गोकुळमधील सत्तेचे गणित बदलण्याची शक्यता निर्माण झाली. कारण, या चार सदस्यांच्या मतांमुळे निवडणुकीत पराभूत झालेल्या भाजपप्रणित गटाला बहुमत मिळवण्याची संधी उपलब्ध होऊ शकते. त्यामुळेच सरकारच्या निर्णयाला सतेज पाटील गटाने तीव्र विरोध केला आहे. निवडणुकीत मतदारांनी दिलेला कौल बदलण्याचा हा प्रयत्न असल्याचा आरोप विरोधकांकडून करण्यात येत आहे. गोकुळवर कोणत्या चार सदस्यांची नियुक्ती? राज्य सरकारने गोकुळ दूध संघावर शिवाजी दिनकर अडनाईक, डॉ. प्रवीणचंद्र हेंद्रे, कृष्णात ज्ञानदेव पाटील आणि प्रशांत पाटोळे या चौघांची स्वीकृत सदस्य म्हणून नियुक्ती केली आहे. विशेष म्हणजे, या चारही सदस्यांना मतदानाचा अधिकार देण्यात आला आहे. यातील प्रशांत पाटोळे हे सांगली जिल्ह्यातील असल्याचा मुद्दाही सतेज पाटील यांनी उपस्थित केला. कोल्हापूरच्या दूध संघामध्ये बाहेरील जिल्ह्यातील व्यक्तीची नियुक्ती करण्यावरूनही त्यांनी सरकारला लक्ष्य केले आहे. न्यायालयाने काय निर्णय दिला? सरकारने केलेल्या या चार सदस्यांच्या नियुक्तीला न्यायालयात आव्हान देण्यात आले होते. या नियुक्त्यांना स्थगिती देण्याची मागणी याचिकेद्वारे करण्यात आली होती. मात्र, न्यायालयाने तातडीने स्थगिती देण्याची विनंती फेटाळून लावली. 10 ऑक्टोबर रोजी मतदान घेण्याचे आदेश देताना सरकारने नियुक्त केलेले चारही सदस्य मतदान करू शकतील; मात्र त्यांची मते मोजली जाणार नाहीत, असा निर्णय न्यायालयाने दिल्याचे वृत्तात नमूद आहे. एकूणच, गोकुळ दूध संघातील सत्तासंघर्ष आता केवळ सहकारी संस्थेपुरता मर्यादित राहिलेला नाही. या प्रकरणाला राजकीय रंग चढला असून, सतेज पाटील गटाच्या आंदोलनाला विविध नेत्यांचा पाठिंबा मिळत आहे. त्यातच अभिजीत दीपके यांनी मुख्यमंत्री देवेंद्र फडणवीस यांच्यावर केलेल्या टीकेमुळे हा वाद आणखी चर्चेत आला आहे. गोकुळवरील वर्चस्वाच्या या लढाईत आता सरकार आणि विरोधकांमधील संघर्ष कोणते वळण घेतो, याकडे राजकीय वर्तुळाचे लक्ष लागले आहे. हेही वाचा…. ‘तुमची संस्थाने उद्ध्वस्त होत आहेत, म्हणून ही टीका’:’गोकुळ’वरून प्रवीण दरेकरांचा पलटवार; म्हणाले- राजकीय दुकानदारी सुरू ठेवण्यासाठीच विरोधकांचा खटाटोप गोकुळ दूध संघावरील शासनाच्या हस्तक्षेपाविरोधात आणि ५ अतिरिक्त संचालकांच्या नियुक्तीविरोधात आज कोल्हापुरात काढण्यात आलेल्या महाविकास आघाडीच्या ‘संघर्ष मोर्चा’त काँग्रेस नेते सतेज पाटील यांनी अत्यंत आक्रमक आणि घणाघाती भाषण केले. या भाषणात त्यांनी मंत्री हसन मुश्रीफ यांच्यावर जातीवादाचा आणि घराणेशाहीचा आरोप करत थेट हल्लाबोल केला. तसेच, महायुती सरकारने गोकुळमध्ये सूडबुद्धीने प्रशासक आणल्याचा खळबळजनक आरोपही त्यांनी केला. यावर आता भाजप नेते प्रवीण दरेकर यांनी प्रतिक्रिया देत आरोपांवर प्रत्युत्तर दिले आहे. सविस्तर वाचा…..



Source link