शिवतीर्थाच्या विकासासाठी एकनाथ शिंदेंकडून 5.75 कोटींची भेट:मंत्री शिवेंद्रराजेंच्या प्रयत्नांना यश; सातारा नगरपरिषदेला विशेष अनुदानाचा शासन निर्णय जारी

साताऱ्याच्या वैभवात भर घालणाऱ्या पोवई नाक्यावरील शिवतीर्थाच्या विकासाचा मार्ग आता मोकळा झाला आहे. या महत्त्वाकांक्षी कामासाठी निधीची प्रतीक्षा संपली असून, राज्य शासनाने सातारा नगरपरिषदेला 5 कोटी 75 लाख रुपयांचे विशेष अनुदान मंजूर केले आहे. सार्वजनिक बांधकाम मंत्री शिवेंद्रसिंहराजे भोसले यांनी केलेल्या प्रयत्नांना उपमुख्यमंत्री एकनाथ शिंदे यांनी तातडीने प्रतिसाद दिल्याने निधीचा प्रश्न मार्गी लागला. पोवई नाका हा साताऱ्याच्या सार्वजनिक जीवनातील महत्त्वाचा केंद्रबिंदू आहे. छत्रपती शिवाजी महाराजांच्या पुतळ्यामुळे या परिसराला विशेष ऐतिहासिक आणि सांस्कृतिक ओळख प्राप्त झाली आहे. या ठिकाणाचा विकास अधिक नियोजनबद्ध आणि आकर्षक पद्धतीने व्हावा, यासाठी निधी उपलब्ध होणे आवश्यक होते. ही गरज लक्षात घेऊन शिवेंद्रसिंहराजे यांनी गुरुवारी रात्री दरे येथे उपमुख्यमंत्री एकनाथ शिंदे यांची भेट घेतली. शिवतीर्थाच्या विकासासाठी स्वतंत्र निधी उपलब्ध करून देण्याची मागणी त्यांनी केली. या मागणीचे गांभीर्य लक्षात घेऊन शिंदे यांनी तातडीने सकारात्मक निर्णय घेतला. विशेष म्हणजे, रात्री झालेल्या चर्चेनंतर शुक्रवारी सकाळीच निधी मंजुरीचा शासन निर्णय निर्गमित झाला. ‘नगरपरिषदांना वैशिष्ट्यपूर्ण कामासाठी विशेष अनुदान’ या योजनेंतर्गत सातारा नगरपरिषदेला हा निधी उपलब्ध करून देण्यात आला आहे. या भेटीवेळी नगराध्यक्ष अमोल मोहिते, माजी उपनगराध्यक्ष तथा नगरसेवक अविनाश कदम आणि नगरसेवक फिरोज पठाण उपस्थित होते. शिवतीर्थाच्या विकासासाठी आवश्यक आर्थिक तरतूद आणि प्रस्तावित कामांबाबत यावेळी चर्चा करण्यात आली. राज्याच्या सत्तेतील वरिष्ठ नेत्यांपर्यंत स्थानिक विकासाचे प्रश्न प्रभावीपणे पोहोचवून त्यावर तातडीने निर्णय मिळवण्याची शिवेंद्रसिंहराजे यांची भूमिका या निमित्ताने अधोरेखित झाली आहे. दुसरीकडे, निधी मंजूर झाल्याने नगरपरिषदेसमोर आता या कामाचे नियोजन, प्रशासकीय प्रक्रिया आणि प्रत्यक्ष अंमलबजावणीचे आव्हान असेल. शिवतीर्थाच्या विकासासाठी निधी उपलब्ध झाला असला, तरी त्यातून कोणत्या सुविधा उभारल्या जाणार, परिसराचे सौंदर्यीकरण कशा पद्धतीने होणार आणि कामाची कालमर्यादा काय असेल, याबाबतची उत्सुकता नागरिकांमध्ये आहे. मंजूर निधीचा विनियोग दर्जेदार आणि वेळेत झाल्यास पोवई नाक्याच्या ऐतिहासिक महत्त्वाला नवी झळाळी मिळू शकते. नगराध्यक्षांकडून समाधान व्यक्त शिवतीर्थाच्या विकासासाठी 5 कोटी 75 लाख रुपयांचा निधी उपलब्ध करून दिल्याबद्दल नगराध्यक्ष अमोल मोहिते यांनी उपमुख्यमंत्री एकनाथ शिंदे आणि मंत्री शिवेंद्रसिंहराजे भोसले यांचे आभार मानले. या निधीमुळे साताऱ्यातील महत्त्वाच्या ऐतिहासिक स्थळाच्या विकासाला गती मिळणार असल्याचे त्यांनी सांगितले.



Source link